ვიმედოვნებ, რომ პრეზიდენტი პუტინი სწორად მოიქცევა და თუ არა, მაშინ სიტუაცია რთული იქნება, - ამის შესახებ აშშ-ის პრეზიდენტმა, დონალდ ტრამპმა Fox News-თან ინტერვიუში განაცხადა.
კითხვაზე, მონაწილეობას მიიღებს თუ არა უკრაინისა და რუსეთის პრეზიდენტების შეხვედრაში, აშშ-ის პრეზიდენტმა, დონალდ ტრამპმა უპასუხა, რომ პირველი შეხვედრა ვოლოდიმირ ზელენსკისა და ვლადიმერ პუტინს შორის გაიმართება.
„საშუალებას მივცემ, რომ ჯერ ისინი შეხვდნენ. ისინი საუკეთესო მეგობრები ნამდვილად არ არიან და კარგი ურთიერთობა არ აქვთ. პრეზიდენტ პუტინს გუშინ დავურეკე, რომელთანაც კარგი ურთიერთობა მაქვს, მაგრამ მნიშვნელობა მხოლოდ იმას აქვს, თუ შედეგს მივაღწევთ, სხვა შემთხვევაში ურთიერთობა არ მაინტერესებს. შვიდი ომი დავასრულე და ვფიქრობდი, რომ ეს ყველაზე მარტივი იქნებოდა, მაგრამ ყველაზე რთულად მოსაგვარებელი აღმოჩნდა. ვიმედოვნებ, რომ პრეზიდენტი პუტინი სწორად მოიქცევა და თუ არა, მაშინ სიტუაცია რთული იქნება. იმედია, ზელენსკიც იმას გააკეთებს, რაც საჭიროა. მან გარკვეული მოქნილობა უნდა გამოიჩინოს“, - განაცხადა დონალდ ტრამპმა.
ამასთან, დონალდ ტრამპის თქმით, ვოლოდიმირ ზელენსკისა და ვლადიმერ პუტინის შესახებ ყველაზე მეტად იმან გააკვირვა, რომ „ახლა ისინი ერთმანეთს ოდნავ უკეთ უგებენ“.
„სხვა შემთხვევაში ორმხრივ შეხვედრას არ დავგეგმავდი. მაშინ სამმხრივ შეხვედრას მოვაწყობდი. ვერ ვიტყვი, რომ ოდესმე საუკეთესო მეგობრები იქნებიან“, - აღნიშნა აშშ-ის პრეზიდენტმა.
