მგონი, ყველასთვის მარტივი გასააზრებელია, რომ ანრი ოხანაშვილის კალიბრის ადამიანს არ დაემორჩილებოდა სახელმწიფო უსაფრთხოების სამსახური, მან ვერ მოახერხა სადავეების ხელში აღება - ეს გადაადგილებები ფუნდამენტურად არაფერს ცვლის, - ამის შესახებ „ლელო-ძლიერი საქართველოს“ ერთ-ერთმა ლიდერმა, თაზო დათუნაშვილმა, სახელმწიფო უსაფრთხოების სამსახურის უფროსად ანრი ოხანაშვილის ნაცვლად, მამუკა მდინარაძის წარდგენასთან დაკავშირებით განაცხადა.
მისივე თქმით, სუს-ს ანრი ოხანაშვილის პირობებშიც „ეფ ეს ბე“ მართავდა და მამუკა მდინარაძის პირობებში იგივე იქნება.
„ეს გადაადგილებები საქართველოს მოქალაქეებისთვის ფუნდამენტურად არაფერს ცვლის. „ეფ ეს ბეს“ ერთ-ერთ დანაყოფად ჩამოყალიბდა სუს-ი საქართველოში. ეს არის ამ ქვეყნის უდიდესი ტრაგედია. შესაბამისად, „ეფ ეს ბე“ მართავდა ანრი ოხანაშვილის პირობებში და „ეფ ეს ბე“ მართავს მამუკა მდინარაძის პირობებში. აქ განსხვავება არაფერში არ არის. რაც გამოვლინდა ზედაპირულად, რაც შეიძლება მარჩიელობის გარეშე ვთქვათ და არავის გაუკვირდება, ვინც საქართველოში პოლიტიკურ პროცესს თვალს ადევნებს, მგონი, ყველასთვის მარტივი გასააზრებელია, რომ ანრი ოხანაშვილის კალიბრის ადამიანს არ დაემორჩილებოდა სახელმწიფო უსაფრთხოების სამსახური, აქ ვხედავ ამ პრობლემას. ოხანაშვილის ავტორიტეტი, პოლიტიკური დონე და წონა - მან ვერ მოახერხა ამ სადავეების ხელში აღება, რაც გასაკვირი არაა, ანრია ოხანაშვილი“, - განაცხადა თაზო დათუნაშვილმა.
ცნობისთვის, სახელმწიფო უსაფრთხოების სამსახურის ყოფილმა უფროსმა, ანრი ოხანაშვილმა თანამდებობის დატოვების შესახებ 23 აგვისტოს განაცხადა, იმავე დღესვე, პრემიერ-მინისტრმა, მის შემცვლელად მამუკა მდინარაძე წარადგინა.
