დონალდ ტრამპი ზელენსკისა და პუტინს შორის მოლაპარაკებებზე - ისინი ჯერ მზად არ არიან, მაგრამ რაღაც მოხდება, ჩვენ ამას მივაღწევთ
04.09.2025 ნახვები: 250
აშშ-ის პრეზიდენტის, დონალდ ტრამპის განცხადებით, რუსეთსა და უკრაინას შორის სამშვიდობო შეთანხმების მიღწევის მცდელობის მიმართ კვლავ ერთგული რჩება.
CBS News-თან ინტერვიუში აშშ-ის პრეზიდენტმა ხაზი გაუსვა, რომ მისი პოზიცია რეალური და ოპტიმისტურია და რომ ყურადღებით აკვირდება, თუ როგორ უმკლავდება ორივე ლიდერი მოლაპარაკებებში არსებულ ამ გზაჯვარედინს.
„ვაკვირდები, ვხედავ და ამაზე ვსაუბრობ პრეზიდენტ პუტინთან და პრეზიდენტ ზელენსკისთან. რაღაც მოხდება, მაგრამ ისინი ჯერ მზად არ არიან. მაგრამ რაღაც მოხდება. ჩვენ ამას გავაკეთებთ“, - განაცხადა ტრამპმა სატელეფონო ინტერვიუში.
მისი თქმით, ფიქრობდა, რომ რუსეთის საკითხის მოგვარება უფრო ადვილი იქნებოდა, მაგრამ უფრო რთული აღმოჩნდა.
„ვფიქრობ, ყველაფერს მოვაგვარებთ. გულწრფელად რომ ვთქვა, რუსეთის საკითხი, ვფიქრობდი, უფრო ადვილი იქნებოდა იმ საკითხებთან შედარებით, რომლებიც შევაჩერე, მაგრამ, როგორც ჩანს, ის ცოტა უფრო რთული აღმოჩნდა, ვიდრე ზოგიერთი სხვა საკითხი“, - აღნიშნა ტრამპმა.
აშშ-ის პრეზიდენტის მტკიცებით, მისი მიდგომა მრავალი დიპლომატიური მოლაპარაკების დროს, იქნება ეს რუსეთთან და უკრაინასთან თუ სხვა მეომარ ქვეყნებთან, არის ის, რომ ის აერთიანებს მთავარ ლიდერებს ერთ ოთახში და მათ საშუალებას აძლევს რეალურ დროში მიაღწიონ შეთანხმებას. მისი თქმით, ეს მიდგომა მოითხოვს მოთმინებას, მაშინაც კი, როდესაც სწრაფი გადაწყვეტაა საჭირო, მაგრამ აშშ-ის თვლის, რომ ამ მიდგომამ გაამართლა წელს მიღწეულ სხვა სამშვიდობო შეთანხმებებში.
„საბედნიეროდ, ძალიან კარგი დღეები გვქონდა და როგორც კი მათ ოთახში ვაერთიანებ, ან სულ მცირე, ერთად საუბარს ვაწყობ, როგორც ჩანს, ყველაფერი კარგად მიდის. ჩვენ მილიონობით სიცოცხლე გადავარჩინეთ“, - აღნიშნა ტრამპმა.
