პრეზიდენტ დონალდ ტრამპის ადმინისტრაციამ აშშ-ის სახელმწიფო მდივანი მარკო რუბიო და გაერთიანებული სამეფოს ყოფილი პრემიერ-მინისტრი ტონი ბლერი ღაზის სექტორის „მშვიდობის საბჭოს“ დამფუძნებელ წევრებად დაასახელა. ინფორმაციას ამის შესახებ „ბიბისი“ ავრცელებს.
თეთრი სახლის მიერ გავრცელებული განცხადების მიხედვით, „დამფუძნებელი აღმასრულებელი საბჭოს“ შემადგენლობაში ასევე შევლენ ტრამპის სპეციალური წარმომადგენელი ახლო აღმოსავლეთში სტივ უიტკოფი და პრეზიდენტის სიძე ჯარედ კუშნერი.
საბჭოს თავმჯდომარის როლს თავად დონალდ ტრამპი შეასრულებს.
ეს ორგანო ტრამპის 20-პუნქტიანი გეგმის ფარგლებში შეიქმნება, რომელიც ისრაელსა და „ჰამასს“ შორის ომის დასრულებას ისახავს მიზნად.
როგორც მედია წერს, საბჭო დროებით უხელმძღვანელებს ღაზის მართვას და კოორდინაციას გაუწევს მის აღდგენას.
დამფუძნებელ აღმასრულებელ საბჭოში ასევე შედიან: კერძო საინვესტიციო ფონდის ხელმძღვანელი მარკ როუენი, მსოფლიო ბანკის პრეზიდენტი აჯაი ბანგა და აშშ-ის ეროვნული უსაფრთხოების მრჩეველი რობერტ გეიბრიელი.
თეთრი სახლის განცხადებით, თითოეულ წევრს დაეკისრება პასუხისმგებლობა იმ მიმართულებაზე, რომელიც „კრიტიკულად მნიშვნელოვანია ღაზის სტაბილიზაციისა და მისი გრძელვადიანი წარმატებისთვის“.
თეთრი სახლის ცნობით, საბჭოს სხვა წევრების ვინაობა უახლოეს კვირებში გახდება ცნობილი.
1tv.ge
