ურსულა ფონ დერ ლაიენი - ევროკავშირმა წარმატებით მოახერხა აშშ-თან თანამშრომლობა გრენლანდიასთან დაკავშირებით მტკიცე პოზიციის შენარჩუნებით

ევროკავშირმა წარმატებით მოახერხა აშშ-თან თანამშრომლობა გრენლანდიასთან დაკავშირებით მტკიცე პოზიციის შენარჩუნებით, თუმცა არა ესკალაციის გზით, – ამის შესახებ ევროკომისიის პრეზიდენტმა, ურსულა ფონ დერ ლაიენმა ევროპული საბჭოს საგანგებო სამიტის დასრულების შემდეგ პრესკონფერენციაზე განაცხადა.

ლაიენის თქმით, ევროკომისია გრენლანდიისთვის არსებით საინვესტიციო პაკეტს უახლოეს მომავალში წარადგენს.

„გრენლანდიასთან დაკავშირებით ჩვენ აშკარად უკეთეს მდგომარეობაში ვართ, ვიდრე 24 საათის წინ ვიყავით. დღეს საღამოს კი ჩვენი კოლექტიური სტრატეგიიდან გაკვეთილები გამოვიტანეთ. რა გავაკეთეთ? პირველ რიგში, გრენლანდიისა და დანიის სამეფოს მიმართ ცალსახა სოლიდარობა იყო. მეორე, ჩვენ ასევე მტკიცედ დავუჭირეთ მხარი ექვს წევრ სახელმწიფოს, რომლებსაც ტარიფები ემუქრებოდათ. მესამე, ჩვენ ძალიან აქტიურად ვითანამშრომლეთ აშშ-თან სხვადასხვა დონეზე. ეს გავაკეთეთ მტკიცე, მაგრამ არაესკალაციის გზით. მეოთხე, ჩვენ კარგად ვიყავით მომზადებულები სავაჭრო კონტრზომებით და არასატარიფო ინსტრუმენტებით, თუ ტარიფებს გამოიყენებდნენ. შეჯამებისთვის, ჩვენ ვიცავდით ოთხ ძირითად პრინციპს. სიმტკიცე, კომუნიკაცია, მზადყოფნა და ერთიანობა და ეს ეფექტური იყო. მომავალში, ჩვენ უნდა შევინარჩუნოთ იგივე მიდგომა.

ჩვენ კოლექტიურად არასაკმარისი ინვესტიციები ჩავდეთ არქტიკასა და არქტიკულ უსაფრთხოებაში, ამიტომ ახლა დროა, წინ წავიწიოთ. ორი წლის წინ, სანამ ეს ყველაფერი დაიწყებოდა, მე გრენლანდიაში ვიყავი, რათა ნუუკში ჩვენი ევროკავშირის ოფისი გაგვეხსნა. გასულ წელს ჩვენ ხელი მოვაწერეთ შეთანხმებებს, რომლებიც სუფთა ენერგიის, კრიტიკული ნედლეულისა და ციფრული კავშირის სფეროში დამატებით ინვესტიციებს გამოიწვევს. ევროკავშირის მომავალი გრძელვადიანი ბიუჯეტისთვის კი უკვე შევთავაზეთ ჩვენი ფინანსური მხარდაჭერის გაორმაგება. ამიტომ, ახლა ჩვენ ვმუშაობთ ევროკავშირისა და გრენლანდიის ურთიერთობების გაღრმავებაზე. ამის ფარგლებში, კომისია მალე წარმოგვიდგენს ინვესტიციების არსებით პაკეტს.ინვესტიციების გარდა, ჩვენ ასევე ვაპირებთ აშშ-სთან და ყველა პარტნიორთან არქტიკის უსაფრთხოების საკითხებში თანამშრომლობის გაღრმავებას“, – განაცხადა ფონ დერ ლაიენმა.

ამასთან, ევროპული საბჭოს პრეზიდენტის, ანტონიუ კოშტას თქმით, დადებითია ის, რომ აშშ-ის მხრიდან ტარიფები არ იქნება.

„დამატებითი ტარიფების დაწესება შეუთავსებელი იქნებოდა ევროკავშირსა და შეერთებულ შტატებს შორის სავაჭრო შეთანხმებასთან. მიზანი კვლავ ევროკავშირსა და შეერთებულ შტატებს შორის სავაჭრო ურთიერთობების ეფექტური სტაბილიზაციაა. ამავდროულად, ევროკავშირი გააგრძელებს თავისი ინტერესების დაცვას, დაიცავს თავს, წევრ სახელმწიფოებს, მოქალაქეებს და კომპანიებს იძულების ნებისმიერი ფორმისგან. მას აქვს ამის გაკეთების ძალა და ინსტრუმენტები და ამას გააკეთებს საჭიროების შემთხვევაში. მომავალში ჩვენ მზად ვართ, გავაგრძელოთ კონსტრუქციული თანამშრომლობა შეერთებულ შტატებთან საერთო ინტერესის ყველა საკითხზე, მათ შორის უკრაინაში სამართლიანი და მდგრადი მშვიდობის პირობების შექმნაზე“, – აღნიშნა კოშტამ.

მისივე თქმით, ევროპასა და შეერთებულ შტატებს „აქვთ საერთო ინტერესი არქტიკული რეგიონის უსაფრთხოების მიმართ, კერძოდ, ნატო-ს ფარგლებში თანამშრომლობის გზით“.

„ამ კონტექსტში, მინდა, სრულიად ნათლად განვაცხადო – დანიისა და გრენლანდიის სამეფოს აქვს ევროკავშირის სრული მხარდაჭერა. მხოლოდ დანიისა და გრენლანდიის სამეფოს შეუძლია, მიიღოს გადაწყვეტილებები დანიასა და გრენლანდიასთან დაკავშირებულ საკითხებზე“, – აღნიშნა კოშტამ.