აშშ-ის ვიცე-პრეზიდენტი აზერბაიჯანსა და სომხეთს ეწვევა

აშშ-ის ვიცე-პრეზიდენტი ჯეი დი ვენსი თებერვალში აზერბაიჯანსა და სომხეთს ეწვევა, – ამის შესახებ აშშ-ის პრეზიდენტი დონალდ ტრამპი სოციალურ ქსელში წერს.

როგორც ტრამპი აღნიშნავს, ვენსი სომხეთსა და აზერბაიჯანში სამშვიდობო ძალისხმევის გასაძლიერებლად გაემგზავრება.

„მინდა, მადლობა გადავუხადო აზერბაიჯანის პრეზიდენტს, ალიევს და სომხეთის პრემიერ-მინისტრს, ფაშინიანს გასული წლის აგვისტოში ხელმოწერილი სამშვიდობო შეთანხმების შესრულებისთვის. ეს იყო საზიზღარი ომი, რვა ომიდან ერთ-ერთი, რომელიც მე დავასრულე, მაგრამ ახლა ჩვენ გვაქვს კეთილდღეობა და მშვიდობა. თებერვალში ვიცე-პრეზიდენტი ვენსი ორივე ქვეყანას ეწვევა, რათა გააძლიეროს ჩვენი სამშვიდობო ძალისხმევა და წინ წასწიოს „ტრამპის მარშრუტი“ საერთაშორისო მშვიდობისა და კეთილდღეობისთვის. ჩვენ გავაძლიერებთ ჩვენს სტრატეგიულ პარტნიორობას აზერბაიჯანთან, მშვიდობიანი ბირთვული თანამშრომლობის შესანიშნავ შეთანხმებას სომხეთთან, გარიგებებს ჩვენი დიდი ნახევარგამტარების მწარმოებლებისთვის და აზერბაიჯანში გაყიდვას აშშ-ში დამზადებული თავდაცვის აღჭურვილობის, როგორებიცაა ჯავშანჟილეტები, ნავები და სხვა“, – წერს ტრამპი.

ცნობისთვის, 2025 წლის აგვისტოში მიღწეულმა შეთანხმებამ სომხეთ-აზერბაიჯანს შორის ათწლეულების განმავლობაში მიმდინარე ომი დაასრულა. შეთანხმებას „სომხეთის რესპუბლიკასა და აზერბაიჯანის რესპუბლიკას შორის მშვიდობისა და სახელმწიფოთაშორისი ურთიერთობების დამყარების შესახებ“ სომხეთის პრემიერ-მინისტრმა, ნიკოლ ფაშინიანმა და აზერბაიჯანის პრეზიდენტმა, ილჰამ ალიევმა აშშ-ის პრეზიდენტის, დონალდ ტრამპის შუამავლობით მოაწერეს ხელი.