სამედიცინო დასკვნის თანახმად, 71 წლის პაპს ფილტვის ადენოკარცინომა აღმოაჩნდა. ოპერაციის დროს ჩატარებულმა ქსოვილის გამოკვლევამ დაადასტურა ექიმების წინასწარი ვარაუდი, რომელიც მანამდე ჩატარებულ სამედიცინო კვლევებს ეფუძნებოდა.
რომის პაპი 13 ოქტომბერს რომის „ჯემელის“ საავადმყოფოში გადაიყვანეს. ქირურგიული ჩარევის საჭიროება მას შემდეგ დადგა, რაც გეგმური სამედიცინო შემოწმებისას ექიმებმა მის ფილტვზე წარმონაქმნი აღმოაჩინეს.
ოპერაცია დაახლოებით 90 წუთს გაგრძელდა. პაპის მთავარმა ქირურგმა, სტეფანო მარგარიტორამ და მისმა პირადმა ექიმმა, ლუიჯი კარბონემ განაცხადეს, რომ ქირურგიულმა ჩარევამ წარმატებით ჩაიარა და გართულებები არ გამოვლენილა.
ვატიკანის სამედიცინო ბიულეტენის მიხედვით, ოპერაციის დასრულების შემდეგ პაპი გონზე მოვიდა და საავადმყოფოს პალატაში გადაიყვანეს.
ფილტვის ადენოკარცინომა ფილტვის კიბოს ერთ-ერთი გავრცელებული ფორმაა. დაავადების მკურნალობის შემდგომი ტაქტიკა დამოკიდებულია სიმსივნის სტადიაზე, გავრცელებასა და პაციენტის ჯანმრთელობის საერთო მდგომარეობაზე.
ამ ეტაპზე გავრცელებულ ინფორმაციაში არ არის მითითებული, რა სტადიაზეა დაავადება და დასჭირდება თუ არა რომის პაპს დამატებითი მკურნალობა.
წყარო: Reuters
