დიდი ბრიტანეთი უკრაინას დამატებით Storm Shadow-ის ტიპის შორი მოქმედების ფრთოსან რაკეტებს გადასცემს, რათა კიევმა ზამთრის დადგომამდე რუსეთის იმ სამხედრო ოპერაციების შეფერხება შეძლოს, რომლებიც უკრაინის სამოქალაქო და ენერგეტიკული ინფრასტრუქტურის წინააღმდეგ არის მიმართული.
ამის შესახებ გამოცემა Bloomberg-ი ინფორმირებულ წყაროებზე დაყრდნობით იუწყება.
გამოცემის ინფორმაციით, ლონდონი უკრაინისთვის Storm Shadow-ის რაკეტების მარაგების შევსებას გეგმავს, რაც კიევს რუსეთის ტერიტორიაზე მდებარე სამხედრო ობიექტებზე დარტყმების განხორციელების შესაძლებლობას შეუნარჩუნებს.
წყაროების ცნობით, აღნიშნული საკითხი 14 ოქტომბერს ლონდონში უკრაინის პრეზიდენტ ვოლოდიმირ ზელენსკისა და ბრიტანეთის მთავრობის წარმომადგენლებთან შეხვედრის დროს განიხილეს.
Bloomberg-ის ინფორმაციით, ბრიტანული მხარე რუსეთის იმ სამხედრო ობიექტებზე უკრაინის დარტყმებს, რომლებიც მშვიდობიანი მოსახლეობისა და სამოქალაქო ინფრასტრუქტურის წინააღმდეგ თავდასხმებში მონაწილეობენ, თავდაცვით ღონისძიებად განიხილავს.
წყაროების განმარტებით, ბოლო კვირების განმავლობაში რუსეთმა რეაქტიული უპილოტო საფრენი აპარატების წარმოება გაზარდა, რაც უკრაინის წინააღმდეგ საჰაერო თავდასხმების ინტენსივობის ზრდის შესაძლებლობას ქმნის.
ამ ვითარებაში, ბრიტანული მხარის შეფასებით, მნიშვნელოვანია, უკრაინას ჰქონდეს რუსეთის სამხედრო შესაძლებლობების შეზღუდვისა და თავდასხმების აღკვეთის საშუალება.
გამოცემის ცნობით, ლონდონი არ იზიარებს პოზიციას, რომ უკრაინამ რუსეთის ტერიტორიაზე დარტყმები ცალმხრივად უნდა შეწყვიტოს, მაშინ როდესაც მოსკოვი უკრაინის წინააღმდეგ სამხედრო ოპერაციებს აგრძელებს.
დიდი ბრიტანეთის მიდგომის თანახმად, უკრაინისთვის შორი მოქმედების შეიარაღების მიწოდება ქვეყნის თავდაცვისუნარიანობის შენარჩუნებასა და რუსეთის მხრიდან ახალი თავდასხმების შეკავებას ემსახურება.
Storm Shadow ბრიტანულ-ფრანგული წარმოების შორი მოქმედების ფრთოსანი რაკეტაა, რომელიც მაღალი სიზუსტით სახმელეთო სამიზნეების გასანადგურებლად გამოიყენება. მისი მოქმედების მანძილი მოდიფიკაციაზეა დამოკიდებული.
უკრაინა აღნიშნულ შეიარაღებას რუსეთის სამხედრო ობიექტების წინააღმდეგ უკვე იყენებს.
Bloomberg-ის ცნობით, დამატებითი რაკეტების მიწოდების გადაწყვეტილება განსაკუთრებით მნიშვნელოვანია ზამთრის მოახლოების ფონზე, როდესაც უკრაინის ენერგეტიკულ ინფრასტრუქტურაზე რუსეთის შესაძლო თავდასხმების საფრთხე იზრდება.
ამ ეტაპზე არ სახელდება, რამდენ Storm Shadow-ის რაკეტას მიიღებს უკრაინა ან როდის დასრულდება მათი გადაცემა.
წყარო: Bloomberg
