ამის შესახებ ზელენსკი სოციალურ ქსელში წერს და აღნიშნავს, რომ შეხვედრაზე განსაკუთრებული ყურადღება რუსეთის მხრიდან უპილოტო საფრენი აპარატებით განხორციელებულ თავდასხმებს დაეთმო.
უკრაინის პრეზიდენტის განცხადებით, პოლონეთის პრემიერ-მინისტრი დეტალურად არის ინფორმირებული უკრაინის წინააღმდეგ რუსეთის სამხედრო მოქმედებებისა და ვითარების ყოველდღიური გამწვავების შესახებ.
„რუსები თითქმის განუწყვეტლივ იყენებენ „შაჰედებს“. ძალიან მნიშვნელოვანია, რომ პოლონეთი გვეხმარება ამ თავდასხმებისგან თავდაცვაში. დეტალურად განვიხილეთ ყველა არსებული საფრთხე და ის ნაბიჯები, რომლებიც რუსული დარტყმების წინააღმდეგ ჩვენი თავდაცვის გაძლიერებას შეუწყობს ხელს“, – აცხადებს ზელენსკი.
მისი თქმით, შეხვედრის ერთ-ერთი მთავარი საკითხი რუსეთის წინააღმდეგ დაწესებული სანქციებიც იყო. უკრაინის პრეზიდენტმა დონალდ ტუსკს მადლობა გადაუხადა მოსკოვის მიმართ მკაფიო პოზიციისთვის და აღნიშნა, რომ საერთაშორისო პარტნიორებმა თავი უნდა შეიკავონ ნებისმიერი გადაწყვეტილებისგან, რომელიც რუსეთს ომის გაგრძელების შესაძლებლობას გაუზრდის.
„მადლობა გადავუხადე დონალდს სანქციებთან დაკავშირებით მისი მკაფიო და პრინციპული პოზიციისთვის: არ უნდა გადაიდგას არცერთი ნაბიჯი, რომელიც რუსეთს ამ ომის გაგრძელებაში დაეხმარება“, – წერს უკრაინის პრეზიდენტი.
თავის მხრივ, პოლონეთის პრემიერ-მინისტრმა დონალდ ტუსკმა უკრაინისადმი მხარდაჭერა კიდევ ერთხელ დაადასტურა და ორ ქვეყანას შორის ურთიერთობების მნიშვნელობაზე გაამახვილა ყურადღება.
მისი განცხადებით, პოლონეთსა და უკრაინას მხოლოდ გეოგრაფიული სიახლოვე არ აკავშირებთ და მათ ერთმანეთის მხარდაჭერის იმედი რთულ ვითარებაშიც შეუძლიათ ჰქონდეთ.
„ჩვენ მხოლოდ მეზობლები არ ვართ. ჩვენ მეგობრები ვართ, რომლებსაც რთულ დროს შეუძლიათ ერთმანეთის იმედი ჰქონდეთ და ამას ვერავინ ვერასდროს შეცვლის“, – აცხადებს ტუსკი.
შეხვედრის შემდეგ გავრცელებულ განცხადებებში არ დაკონკრეტებულა, შეთანხმდნენ თუ არა მხარეები უკრაინისთვის დამატებითი სამხედრო დახმარების კონკრეტულ პაკეტზე ან საჰაერო თავდაცვის ახალი საშუალებების გადაცემაზე.
