მთავრობა გეგმავს, რომ დამატებით კიდევ 30 თეთრი „პიკაპი„ შეძინოს.
შესყიდვების სააგენტოს ვებ-გვერდზე გამოქვეყნებული ინფორმაციის მიხედვით, ტენდერში განცხადებების მიღება უკვე დასრულებულია. შესყიდვის სავარაუდო ღირებულება კი 2 938 500 ლარია. ამ ეტაპზე შერჩევა-შეფასება მიმდინარეობს.
როგორც შესყიდვების სააგენტოს ვებ-გვერდიდან ირკვევა, ტენდერში ყველაზე დაბალი ფასი კომპანიამ „კავკასუს მოტორსმა" წარადგინა. მის მიერ შეთავაზებული თანხა 2 938 500 ლარს შეადგენს.
სატენდერო პირობების მიხედვით, მომწოდებელი ვალდებულია, რომ ავტოსატრანსპორტო საშუალებების მიწოდება 2021 წლის 1-ელ ოქტომბრამდე განახორციელოს.
დოკუმენტაციის მიხედვით, შემოთავაზებული ავტომობილები უნდა იყოს ახალი, არაუადრეს 2020 წლის გამოშვების, მარცხენასაჭიანი, ექსპლუატაციაში არმყოფი (გარბენი არაუმეტეს 200კმ), ნივთობრივად და უფლებრივად უნაკლო და განბაჟებული. ამასთან, მიმწოდებელმა საკუთარი ხარჯებით უნდა უზრუნველყოს ავტომანქანების შემსყიდველზე გადაფორმება. შემოთავაზებული სატრანსპორტო საშუალებები უნდა იყოს თეთრი ფერის.
შეგახსენებთ: მთავრობამ უკვე შეიძინა 60 თეთრი „პიკაპი".
29 აპრილს, „პიკაპების" შესყიდვაზე გამოცხადებული ტენდერი დასრულდა. კონსოლიდირებულ ტენდერში უმცირესი ფასი - 5 909 640 ლარი შპს „ჯი-თი მოტორსმა" დააფიქსირა. შესაბამისად, მთავრობას 60 თეთრი პიკაპი სწორედ აღნიშნულმა კომპანიამ მიაწოდა.
