„განმაცვიფრა იმან, რომ უცებ, ყოველგვარი წინაპირობის გარეშე, გახარიამ თქვა, რომ უმრავლესობის წევრები არათუ არ იყვნენ, არამედ, გაიპარნენ და თან დამამცირებელი ეპითეტებით შეგვამკო," - განაცხადა დღეს, 15 ივნისს, პარლამენტის პირველმა ვიცე-სპიკერმა, გია ვოლსკიმ ყოფილი პრემიერის, პარტია „საქართველოსთვის" ლიდერის, გიორგი გახარიაზე „ქართული ოცნების" თავმჯდომარის, ირაკლი კობახიძის განცხადებების კომენტირებისას.
მისივე თქმით, ირაკლი კობახიძეს „გულწრფელობას" უწუნებს.
„ერთია, შეცდომები, რაზეც ირაკლი კობახიძემ ილაპარაკა და თუ ირაკლი კობახიძეს რაიმეს „დაუწუნებ", მხოლოდ გულწრფელობა იყო, საზოგადოება ყველა საკითხზე ინფორმაციის მიღებას იმსახურებს, მათ შორის, 20 ივნისზე. განმაცვიფრა იმან, რომ უცებ, ყოველგვარი წინაპირობის გარეშე, გახარიამ თქვა, რომ უმრავლესობის წევრები არათუ არ იყვნენ, არამედ გაიპარნენ და თან დამამცირებელი ეპითეტებით შეგვამკო მაშინ, როცა სრულიად სხვა ვითარება იყო.
როცა საზოგადოება, თანაგუნდელები ელოდებიან ისეთი ოპერაციის ჩატარებას, რომელიც მაღალ პროფესიონალურ დონეზე იქნება ჩატარებული და არ გამოიწვევს ამდენ დაზარალებულს, როგორც პოლიციელებს შორის, ასევე საზოგადოებაში, კითხვები ჩნდება, მაგრამ ეს კითხვები კონკრეტული პერიოდიდან, თებერვლიდან გადაიზარდა ეჭვებში და ეჭვების საფუძველზე საკმაოდ ვრცლად ისაუბრა ირაკლი კობახიძემ. შემიძლია დავამატო, რომ სრულიად გაუგებარი გადაწყვეტილება მიიღო გიორგი გახარიამ, თურმე, ოპერაციის ორი-სამი დღით გადადებაა საჭირო, რათა ადამიანმა ძალა მოიკრიბოს, რომელიც პრაქტიკულად, დამნაშავეა და დაანონსეს სახელმწიფო სტრუქტურების არარსებობა ქვეყანაში. ანუ სახელმწიფოს საფუძვლების რყევაზე იყო საუბარი და ამ თემაზე იყო მთავარი აქცენტები გაკეთებული." - განაცხადა ვოლსკიმ
ვოლსკის თქმით, შეცდომებზე საუაბრი და გარჩევა გუნდში უნდა მოხდეს.
„შეცდომები ერთია, რაზეც გუნდში საუბარია, გარჩევაა, ხვალ შეიძლება მეც შეცდომა დავუშვა, მაგრამ როცა შეცდომები პოლიტიკურ პროცესს უკავშირდება, რომელმაც სახელმწიფოს საფუძვლები შეიძლება სერიოზულად შეარყიოს, უკვე სხვა კატეგორიაში გადადის შენიშვნები,"- განაცხადა ვოლსკიმ.
