საპარლამენტო ოპოზიციის ნაწილმა დეოლიგარქიზაციის საკითხზე პარლამენტში დახურული კონსულტაციები გამართეს. „ლელომ“, „სტრატეგია აღმაშენებელმა“, „ერთიანმა ნაციონალურმა მოძრაობამ“ და დამოუკიდებელი დეპუტატების ნაწილმა დახურულ კარს მიღმა ევროკავშირის 12 რეკომენდაციიდან, მე-5 პუნქტის, დეოლიგარქიზაციის საკანონმდებლო ჩარჩოს ძირითად პრინციპებზე იმსჯელეს.
როგორც „ნაციონალური მოძრაობის“ წევრმა, ლევან ბეჟაშვილმა შეხვედრის დასრულების შემდეგ ჟურნალისტებს განუცხადა, დეოლიგარქიზაციასთან დაკავშირებით უნდა შეიქმნას ქართული მოდელი, რომელიც საქართველოს რეალობასთან იქნება შესაბამისობაში.
„დღევანდელი შეხვედრა დაეთმო დეოლიგარქიზაციის შესახებ საკანონმდებლო ჩარჩოების განსაზღვრას. მნიშვნელოვანია, რომ უკრაინული მოდელი, რომელზეც აპელირებს „ქართული ოცნება“, არანაირად არ შეესაბამება ქართულ რეალობას. უკრაინაში ბევრი ოლიგარქია. მათ სახელისუფლებო ბერკეტები ნამდვილად არ აქვთ, განსხვავებით საქართველოს მოდელისა, სადაც ბიძინა ივანიშვილი პრაქტიკულად ქვეყნის მთლიანი შიდა პროდუქტის 30%-ს ფლობს.
სახელისუფლებო ბერკეტებზე უშუალო ზეგავლენა აქვს კონკრეტული თანამდებობის პირების დანიშვნით და ა.შ. ჩვენ უნდა შევქმნათ ქართული მოდელი. ის მოდელი, რომელიც შეესატყვისება საქართველოს რეალობას. ოლიგარქიის ცნებისათვის განმსაზღვრელი უნდა იყოს ის, რომ პირი უნდა ფლობდეს მშპ-ს დაახლოებით 1%-ზე მეტს. ასევე მნიშვნელოვანია მედიაზე კონტროლის ნაწილი და სახელისუფლებო ბერკეტებზე ზეგავლენა, რაც ქართულ რეალობაში აბსოლუტურად თვალსაჩინოა. ვინაიდან სწორედ ბიძინა ივანიშვილთან მომუშავე კონკრეტული პირები არიან პრემიერ-მინისტრი, უშიშროების სამსახურის ხელმძღვანელი, შინაგან საქმეთა მინისტრი და ა.შ. ამ გავლენების დადგენა მარტივი საქმეა. ჩვენ უნდა ვიმუშაოთ ისეთ საკითხებზე, რომლებიც ქართულ რეალობას შეესაბამება და კანონმდებლობაში ქართულ რეალობას ასახავს. კონკრეტულად როგორი იქნება კანონის აღსრულების მექანიზმები, ეს ცალკე სასაუბრო თემაა. მოლოდინი, რომ „ქართულ ოცნებას“ გონება გაუნათდება და ისინი თავად დაადგენენ ბიძინა ივანიშვილთან მიმართებით ოლიგარქის ცნების შესატყვისობას, არ არსებობს. ამიტომ ალტერნატიული მექანიზმები უნდა ჩამოყალიბდეს, თუ როგორ მოხდება ოლიგარქიის შესახებ კანონმდებლობის აღსრულება“, – განაცხადა ლევან ბეჟაშვილმა.
