ანტისახელმწიფოებრივი განცხადებები ოპოზიციაში უნდა მოვიკითხოთ, რასაც ყოველდღიურ რეჟიმში ვისმენთ, მათი დამოკიდებულება, დღის წესრიგი არის ზუსტად ანტისახელმწიფოებრივი, – ამის შესახებ თბილისის მერმა კახა კალაძემ განაცხადა.
ჟურნალისტებმა კახა კალაძეს კითხვა დაუსვეს პარტია „ქართული ოცნების“ თავმჯდომარის იმ განცხადებაზე, სადაც ირაკლი კობახიძე აღნიშნავს: „ხალხს უნდა ვკითხოთ, უნდათ მეორე ფრონტი საქართველოში, თუ – არა“.
კალაძის თქმით, ქვეყანას დღეს ჰყავს პატრიოტი ადამიანებისგან შემდგარი ხელისუფლება და საქართველოში მეორე ფრონტი არ გაიხსნება.
„ანტისახელმწიფოებრივი მიდგომები, განცხადებები ზუსტად ოპოზიციაში უნდა მოვიკითხოთ, რასაც ვისმენთ ყოველდღიურ რეჟიმში, მათი დამოკიდებულება, მათი დღის წესრიგი არის ზუსტად ანტისახელმწიფოებრივი, ყველა წარმატებას, წინსვლას ეწინააღმდეგებიან. ყველაფრის მიუხედავად, დღეს ჩვენს ქვეყანას ჰყავს ეროვნული, პატრიოტი ადამიანებისგან შემდგარი ხელისუფლება. ჩვენ ვიმოქმედებთ ისე, როგორც სჭირდება ჩვენს ქვეყანას, როგორც სჭირდება ჩვენს ხალხს. დღეს, ისე როგორც არასდროს, ქვეყანაში მნიშვნელოვანია, შევინარჩუნოთ მშვიდობა, სიმშვიდე და ხელი შევუწყოთ ეკონომიკურ განვითარებას. ასე რომ, საქართველო არ ჩაებმევა არც სანქციებში და არც ომში მიიღებს მონაწილეობას, მეორე ფრონტი არ გაიხსნება საქართველოში“, – განაცხადა კახა კალაძემ.
