„იმ პარლამენტში ჯდომა, სადაც „ქართული ოცნების" უმრავლესობა მოპარული არჩევნებით არის, ნამდვილად არავისთვის კომფორტს არ წარმოადგენს", - ასე ეხმიანება პარტია ,,ლელოს" დღეს 23 ივნისს, ოპოზიციის მისამართით გაკეთებულ შეთავაზებას ,,ნაციონალური მოძრაობის" დეპუტატი, გიორგი ბოტკოველი.
ბოტკოველის განმარტებით, ხაზარაძის ინიციატივა მისაღებია, თუმცა საკითხთან დაკავშირებით საჭიროა მსჯელობა.
„მოულოდნელი არ ყოფილა, რომ „ქართული ოცნება" ყველაფერს შეეცდება, ის „კლანი" გააძლიეროს და გაამყაროს, რომელიც დღეს არსებობს სასამართლოში. რაც შეეხება „ლელოს" შემოთავაზებას - გასაგებია, მისაღებია ეს შემოთავაზება, მაგრამ ნებისმიერ გადაწყვეტილებას, რასაც მივიღებთ, მივიღებთ პირველ რიგში „ნაციონალური მოძრაობის" ფრაქციის ფორმატში და ამ გადაწყვეტილებას მივიღებთ პოლიტიკური საბჭოს ფორმატში, როგორც ჩვენ გავაკეთეთ, შემოსვლასთან დაკავშირებით, რომ გადაწყვეტილება მიიღო პოლიტიკურმა საბჭომ, ამ გადაწყვეტილებას დავემორჩილებით ასევე", - განაცხადა ბოტკოველმა.
ცნობისთვის, მამუკა ხაზარაძემ ოპოზიციურ პარტიებს, პარლამენტის ბოიკოტირებისკენ მოუწოდა იმ შემთხვევაში, თუ მმართველი გუნდი, უზენაესი სასამართლოს მოსამართლეთა დანიშვნას არ შეაჩერებს.
