გვაქვს სრული კონსენსუსი შესაბამის პარტიებთან და საერთო თანხმობის საფუძველზე ხელმოწერებით დაინიცირდება ეს კანონპროექტი,- ამის შესახებ ჟურნალისტებთან პარტია „ქართული ოცნების" თავმჯდომარე ირაკლი კობახიძემ საკონსტიტუციო ცვლილებებთან დაკავშირებით ოპოზიციურ პარტიებთან შეხვედრის დასრულების შემდეგ განაცხადა.
მისი თქმით, შეთანხმება საკონსტიტუციო ცვლილებების პროექტთან დაკავშირებით, შარლ მიშელის დოკუმენტზე ხელმომწერ პარტიებთან, მიღწეულია.
„დღეს ოპოზიციის წარმომადგენლებთან, ვინც ხელი მოაწერეს მიშელის დოკუმენტს, ჩვენ სრულად შევთანხმდით იმ პროექტზე, რომელიც დაინიცირდება და რომელიც კონსტიტუციის გარდამავალ დებულებებში ცვლილებების განხორციელებას ითვალისწინებს.
პირველი - რაც შეეხება საარჩევნო ბარიერს, დაინიცირდება პროექტი 2- პროცენტიან ბარიერთან დაკავშირებით და უზრუნველყოფილი იქნება პროპორციული არჩევნების ჩატარება 2 - პროცენტიანი ბარიერით უკვე შემდეგი საპარლამენტო არჩევნებისთვის. ფრაქციის შექმნის უფლება განისაზღვრება უკვე 4 დეპუტატისთვის და რაც შეეხება გენპროკურორის არჩევის წესს, აქაც არის შეთანხმებული კონკრეტული ტექსტი, რომელიც ეფუძნება მიშელის დოკუმენტს. სამივე საკითხთან დაკავშირებით გვაქვს სრული კონსენსუსი შესაბამის პარტიებთან და საერთო თანხმობის საფუძველზე ხელმოწერებით დაინიცირდება ეს კანონპროექტი,"- განაცხადა კობახიძემ.
