არჩევნების გაყალბების შემდეგ „ქართულ ოცნებას" მოუწია აღიარება ვადამდელ საპარლამენტო არჩევნებზე შეთანხმების მიღწევის თვალსაზრისით და ამავე დროს, მოუწია ცესკო-ს თავმჯდომარის თამარ ჟვანიას გადაყენებაც, - ამის შესახებ „ნაციონალური მოძრაობის" წევრმა, ლევან ბეჟაშვილმა განაცხადა.
მისივე თქმით, ახლა მთავარი ამოცანა უნდა იყოს, რომ ახალი თავმჯდომარის შესარჩევად პროცესში იმ კანდიდატებმა მიიღონ მონაწილეობა, რომლებსაც პროფესიული გამოცდილება და უნარები აქვთ.
„ახლა ჩვენი მთავარი ამოცანა უნდა იყოს, რომ არ მივიღოთ ახალი თამარ ჟვანია ცენტრალურ საარჩევნო კომისიაში. ამიტომ, შერჩევის პროცესში ყველა იმ კანდიდატმა უნდა მიიღოს მონაწილეობა, რომელსაც აქვს პროფესიული გამოცდილება, უნარები და პარლამენტმა მაღალი კვორუმით, შეთანხმების საფუძველზე უნდა დანიშნოს ადამიანი ცესკო-ში", - განაცხადა ლევან ბეჟაშვილმა.
ცენტრალური საარჩევნო კომისიის თავმჯდომარემ, თამარ ჟვანიამ თანამდებობა დატოვა. ამის შესახებ ჟვანიამ „ფეისბუქის" საკუთარ გვერდზე დაწერა.
როგორც ჟვანია აღნიშნავს, შარლ მიშელის შეთანხმების საფუძველზე მიღებულმა საარჩევნო რეგულაციებმა ახალი რეალობა მოიტანა და ცენტრალური საარჩევნო კომისიის თავმჯდომარის ახალი წესით არჩევა იქნება დამატებითი, ხელშემწყობი ფაქტორი ფართო პოლიტიკური თანხმობისთვის.
პარლამენტის მიერ რამდენიმე დღის წინ დამტკიცებული „საარჩევნო კოდექსის" გათვალისწინებით, ცესკო-ს თავმჯდომარეს, პრეზიდენტის წარდგინებით, პარლამენტი ხმების ორი მესამედით ირჩევს.
