იგივე "ალდე", 2012 წელს როცა ხმამაღლა წერდა, სააკაშვილო, ივანიშვილს ნუ ერჩი არასწორი მეთოდებით, სასამართლოში ნუ დაატარებ მის ხალხს, მაშინ ივანიშვილს ეს ძალიან უხაროდა, "ალდესთან" მეგობრობდა, ვინც ახლა "ალდეზე" კომენტარებს აკეთებს, მაშინ სად იყვნენ, მე არავინ მახსოვს,- ასე ეხმიანება "ლელოს" დეპუტატი დავით უსუფაშვილი ნიკა გვარამიას შესახებ "ალდეს" განცხადებაზე "ქართული ოცნების" წევრების კრიტიკას, რომ ეს სასამართლო ხელისუფლებაში ჩარევაა.
მისი თქმით, "ალდე" "ვირეშმაკობების ტყვეობაში არ ექცევა" და გვარამიას დაჭერა არსებულ ვითარებაში და არსებული ბრალდებით სიგიჟე იყო.
"თავის დროზე „ალდე“ ყველაზე ხმამაღლა და დროულად მიუთითებდა სააკაშვილის სასამართლოს არასწორ გადაწყვეტილებებზე. იქ ის ხალხია, ვინც ხედავს და ვირეშმაკობების ტყვეობაში არ ექცევა, არც ქართველი ხალხი ტყუვდება, უბრალოდ, ჩვენთან ბევრს მიაჩნია, რომ ახლა ამაზე ლაპარაკი არ ღირს, რადგან ჩვენთან ხომ სულ ასე ხდება. ევროპა ასეთი არაა, ასეთი თეთრი ძაფით ნაკერ საქმეებზე მაშინაც მიუთითებდა, რომ სააკაშვილის სასამართლო არღვევდა უფლებებს, "ალდე" ლაპარაკობდა ამას, აქ ახლა ვინც კომენტარებს აკეთებს, მაშინ სად იყვნენ, მე არავინ მახსოვს, მაგრამ ვისაც ახსოვს, ივანიშვილია. „ალდე“ არის სტანდარტების მხარდამჭერი. გვარამიას დაჭერა იყო სიგიჟე იმ მოტივით, იმ ბრალდებით, იმ ვითარებაში და ახლა ქვეყანა უნდა დაისაჯოს? ყველა ყოფილმა პროკურორმა გვარამიასავით თავის თავზე უნდა გამოსცადოს პოლიტიკური მართლმსაჯულების მსახვრალი ხელი, მაინც და მაინც შოთაძე უნდა აღმოჩნდეს ასეთ ვითარებაში, რომ ჭკუა ისწავლოს?! დარწმუნებული ვარ, გვარამიამ ისწავლა ჭკუა, 7 ნოემბრის დროს ისიც იყო გენპროკურორის მოადგილე და ათას რაღაცას თითხნიდა თავის თანამშრომლებთან ერთად, ახლა ნახა, რა საშინელებაა ეს, მაგრამ რა დააშავა ქვეყანამ, გვარამიები როდის ისწავლიან ჭკუას, შოთაშეები, უსუფაშვილები ამას გადაყვეთ თუ ერთხელ და სამუდამოდ პოლიტიკური სტანდარტი დავამკვიდროთ?!"- განაცხადა უსუფაშვილმა.
