ძალიან მოგვწონს ეს კანონი, სხვა კრიტერიუმებს ვერ გამოვიგონებთ, გარდა იმისა, რაც უკრაინულ კანონშია, მაგრამ არის ერთი ხარვეზი - ჩვენი შეთავაზებაა, რომ ოლიგარქთა რეესტრი პარლამენტთან შექმნილმა ნეტრალურმა, დამოუკიდებელმა კომისიამ შეადგინოს,- ამის შესახებ "ნაციონალური მოძრაობის" დეპუტატმა რომან გოცირიძემ განაცხადა.
რომან გოცირიძე მიიჩნევს, რომ პარლამენტთან არსებულ კომისიას პარლამენტი მაღალი კვორუმით შექმნის და მას სანდოობა ექნება. როგორც მან აღნიშნა, კომიკურია, რომ პარლამენტი გეგმავს რეესტრის შემდგენ ორგანოდ განსაზღვროს მთავრობა და "ივანიშვილის მონა- მორჩილი ღარიბაშვილი" .
"ქართულ ოცნებას" უნდა ისე შეფუთოს, რომ თითქოს დეოლიგარქიზაციის კანონი არ უნდა ოპოზიციას, რადგან ეჭვები აქვს, რომ ოლიგარქები არ აღმოჩნდნენ მის წრეში, ეს არასწორია. ძალიან მოგვწონს ეს კანონი, სხვა კრიტერიუმებს ვერ გამოვიგონებთ გარდა იმისა, რაც უკრაინულ კანონშია და იქ მთავარი კრიტერიუმია ფულით გავლენა პოლიტიკაზე, პოლიტიკური აქტიურობა და მედიის ფლობა და ძალიანაც კარგი კრიტერიუმებია, მაგრამ არის ერთი ყველაზე დიდი ხარვეზი ქართულ ვერსიაში, უკრაინული კანონით ოლიგარქთა რეესტრს ადგენს პრეზიდენტი და მასთან არსებული უშიშროების საბჭო, საქართველოში კი პარლამენტი. ჩვენი შეთავაზებაა, რომ ოლიგარქის სტატუსი არსებული კრეტერიუმებიდან გამომდინარე განსაზღვროს პარლამენტთან შექმნილმა ნეიტრალურმა, დამოუკიდებელმა კომისიამ. კომისია უნდა შეიქმნას დიდი კვორუმით, მაგალითად, პარლამენტის 100 წევრით, 2/3- ით, შესაბამისად, ოპოზიციის გარეშე ამ კომისიას ვერ შექმნის უმრავლესობა და მას ექნება ნდობა. მაგრამ ამას არასდროს გააკეთებს, პირიქით, პარლამენტიდანაც კი გამოაქვთ და პრემიერ-მინისტრს უქვემდებარებენ, წარმოგიდგენიათ, რა კომიკური სიტუაცია იქნება, როცა ოლიგარქის რეესტრს შეადგენს ივანიშვილის მონა-მორჩილი ღარიბაშვილი?! გაუბედავს ღარიბაშვილი ივანიშვილს რეესტრში შეყვანას? ბოლოს და ბოლოს პრეზიდენტმა შეადგინოს, ან საჯარო სამსახურის ბიურომ, სადაც სახელმწიფო მოხელეები დეკლარაციებს აბარებენ, ან აუდიტის სამსახურმა გააკეთოს, რომელიც აკვირდება პოლიტიკური პარტიების საარჩევნო ბიუჯეტს, მაგრამ არა, მათ საკუთარ ხელში უნდათ ჰქონდეთ ის მექანიზმი, რომლითაც ოპოზიციას გამოაცხადებს ოლიგარქებად, დევნას დაუწყებს და თავის ოლიგარქებს ხელს გადააფარებს,"- განაცხადა გოცირიძემ.
