ყველაფერს გავაკეთებთ იმისთვის, რომ ეს ადამიანები, რომლებიც კოლექტიურად კლავენ ჩემს შვილს, სამაგალითოდ დაისაჯონ, - ამის შესახებ მესამე პრეზიდენტის მიხეილ სააკაშვილის დედამ გიული ალასანიამ საგანგებო ბრიფინგზე განაცხადა.
როგორც ალასანიამ განაცხადა, მიხეილ სააკაშვილმა დღეს კლინიკა „ვივამედში“ გონება დაკარგა და ეს იყო უკვე გონების დაკარგვის მეორე შემთხვევა. მისივე თქმით, მესამე შემთხვევა ნებისმიერ შემთხვევაში შეიძლება განმეორდეს, რაც შეიძლება ფატალურად დამთავრდეს.
ალასანიას განცხადებით, საერთაშორისო მკვლელობა ხდება ყველას თვალწინ, რაშიც დამნაშავე ისტებლიშმენტი იქნება.
„ბოდიში, რომ შეგაწუხეთ, მაგრამ საგანგაშო მდგომარეობა მაქვს. დღეს, „ვივამედის“ კლინიკაში ჩემმა შვილმა, მიხეილ სააკაშვილმა გონება დაკარგა. ეს იყო გონების დაკარგვის მეორე შემთხვევა გლდანის ციხის მერე. ამ ორი ეპიზოდის შუალედში იყო პატარა ეპიზოდი, მაგრამ არ იყო ასეთი მძიმე მდგომარეობა. დღეს ძალიან გაუჭირდათ ადამიანის მოსულიერება. ბადრაგები ჩაერთნენ. იატაკზე იყო დაგდებული და აიყვანეს. სათანადო ღონისძიება ჩაუტარდა და როგორც იქნა მოასულიერეს. მესამე შემთხვევა ნებისმიერ შემთხვევაში შეიძლება განმეორდეს და ფატალურად დამთავრდეს. ძალიან მძიმე რეალობა გვაქვს.
ის კი არ არის, რომ ჩემი შვილი აღარ იქნება, არ იქნება სახელმწიფო. არ არის ის, რომ წელში გადატყდება დემოკრატია ან სიტყვის თავისუფლება, რომლის მნიშვნელობაც აქ ნაკლებად ესმით, განსაკუთრებით ეს არ ესმის ისტებლიშმენტს, რომელიც დღეს ჩემს შვილს კლავს. ეს არის საერთაშორისო მკვლელობა. საერთაშორისო მკვლელობა ხდება ყველას თვალწინ. მთელი მსოფლიო დგას ფეხზე. უამრავ გაზეთში დაიბეჭდა უკვე. უამრავი ტელევიზია აშუქებს ჩვენ გასაჭირს.
გუშინ, მსოფლიო მასშტაბის აქცია ჩატარდა, სადაც ძალიან ბევრმა ადამიანმა მიიღო მონაწილეობა. არამარტო ქართველები იყვნენ, იყვნენ უკრაინელები, პოლონელები და სხვები, მათ შორის, პოლიტიკური მოღვაწეები, რომლებიც მოითხოვდნენ ჩემი შვილის გადაყვანას და შველას. ჩვენი ქვეყნიდან არანაირი რეაქცია არ არის. ვისკენ გავიშვირო ხელი? ვინა რის დამნაშავე? ისტებლიშმენტი მთლიანად. ყველაფერს გავაკეთებთ იმისთვის, რომ ეს ადამიანები, რომლებიც კოლექტიურად კლავენ ჩემს შვილს, სამაგალითოდ დაისაჯონ", - განაცხადა გიული ალასანიამ.
