უკრაინის პრეზიდენტის ოფისის მრჩეველი ალექსეი არესტოვიჩი დნიპროს მოსახლეობას ბოდიშს უხდის და უკრაინის თავდაცვის სისტემის მიერ რუსული რაკეტის ჩამოგდების შესახებ თავის განცხადებას სერიოზულ შეცდომას უწოდებს. აღნიშნულ საკითხზე მან კომენტარი მარკ ფეიგინთან იუთუბარხზე ეთერში გააკეთა.
როგორც არესტოვიჩმა აღნიშნა, სოციალურ ქსელებში მისი განცხადების განხილვის ასეთი ტალღა შესაძლოა, გამოწვეული ყოფილიყო ან საზოგადოებაში დაძაბულობით, ან ორგანიზებული ყოფილიყო ბოტების ქსელის მიერ.
„ეს არის ორგანიზებული კამპანია, რომელიც ნებით თუ უნებლიეთ აიტაცა ამ ომით და ამ დანაშაულით ტრავმირებულმა ხალხმა“, – განაცხადა არესტოვიჩმა და აღნიშნა, რომ ეს იყო „ოპოზიციის მიერ რუსებთან ერთად“ ჩატარებული საინფორმაციო ოპერაცია.
ამასთან, მან ბოდიში მოუხადა დნიპროს მცხოვრებლებს და დაზარალებულებს, ასევე ყველა იმ ადამიანს, ვისაც მისი სიტყვები შეეხო.
„მე რეალურად მინდა, ბოდიში მოვიხადო, ბოდიში მოვუხადო დაღუპულთა და დაშავებულთა ნათესავებს და ახლობლებს. დნიპროს მცხოვრებლებს, რომლებიც პირადად განიცდიან ამ ტრაგედიას და რომლებმაც ერთი აფეთქება გაიგონეს და იციან, რომ რაკეტა ერთი იყო. ასევე, ყველა უკრაინელს და არაუკრაინელს, ვისაც ჩემი სიტყვები ასევე შეეხო“, – განაცხადა არესტოვიჩმა.
შეგახსენებთ, რომ უკრაინის პრეზიდენტის ადმინისტრაციის მრჩეველმა, ალექსეი არესტოვიჩმა განაცხადა, რომ რაკეტა, რომელიც უკრაინის ქალაქ დნიპროში საცხოვრებელ კორპუსს მოხვდა, უკრაინის საჰაერო თავდაცვის სისტემამ ჩამოაგდო და დაცემისას აფეთქდა. აღნიშნული განცხადების გამო, უკრაინის რადაში ალექსეი არესტოვიჩის გადაყენების მოთხოვნით ხელმოწერებს აგროვებენ.
