შინაგან საქმეთა სამინისტრო ღრმა მწუხარებას გამოთქვამს კახეთის პოლიციის დეპარტამენტის საგარეჯოს რაიონული სამმართველოს უფროსი დეტექტივის, პოლიციის უფროსი ლეიტენანტის, 1985 წელს დაბადებული ოთარ ღვინაშვილის გარდაცვალების გამო და თანაუგრძნობს გარდაცვლილის ოჯახს, თანამშრომლებსა და ახლობლებს.
„შინაგან საქმეთა სამინისტროს კახეთის პოლიციის დეპარტამენტის საგარეჯოს რაიონული სამმართველოს უფროსი დეტექტივი, პოლიციის უფროსი ლეიტენანტი ოთარ ღვინაშვილი საგარეჯოში, ერთ-ერთი მრავალბინიანი საცხოვრებელი კორპუსის ეზოდან სროლის შესახებ მიღებულ გამოძახებაზე კოლეგასთან ერთად გამოცხადდა. თავდამსხმელმა პოლიციელებს ერთ-ერთი საცხოვრებელი ბინიდან ცეცხლი გაუხსნა. მიყენებული ჭრილობების შედეგად, პოლიციის უფროსი ლეიტენანტი, ოთარ ღვინაშვილი გარდაიცვალა. საგარეჯოში მომხდარის შედეგად გარდაცვლილია პოლიციის თანამშრომელი, ოთხი მოქალაქე და ასევე, თავდამსხმელი. სხეულის სხვადასხვა დაზიანება მიიღო ხუთმა პირმა. გამოძიება სისხლის სამართლის კოდექსის 109-ე და 236-ე მუხლებით გრძელდება“, – ნათქვამია შსს-ს განცხადებაში.
შეგახსენებთ,
წუხელ საგარეჯოში მომხდარი შემზარავი ფაქტის დროს, როდესაც 49 წლის, ყოფილმა სამხედრო მოსამსახურემ ნოდარ ათუაშვილმა, საკუთარი საცხოვრებელი ბინიდან ავტომატური ცეცხლსასროლი იარაღით ხუთი ადამიანი მოკლა და ხუთი დაჭრა, ერთ-ერთი გარდაცვლილი პოლიციის თანამშრომელი - ოთარ ღვინაშვილია.
შს მინისტრის ვახტანგ გომელაურის განცხადებით, პოლიციის თანამშრომელი, რომელიც შემთხვევის ადგილზე იმყოფებოდა ნოდარ ათუაშვილის გასროლის შედეგად დაიჭრა და საავადმყოფოში მიყვანამდე გარდაიცვალა.
„დაიჭრა ჩვენი თანამშრომელი, რომელიც საავადმყოფოში გადაყვანის დროს დაიღუპა“, - განაცხადა გომელაურმა.
შეგახსენებთ, რომ საგარეჯოში, მომხდარი ფაქტის შედეგად, ყოფილმა სამხედრო მოსამსახურემ, ნოდარ ათუაშვილმა, 5 ადამიანი მოკლა და ხუთი დაჭრა.
ათუაშვილმა თვითლიკვიდაცია განახორციელა.
ადგილობრივებმა არ იციან თუ რა გახდა თავდასხმის მიზეზი. ამბობენ, რომ პირს იცნობდნენ, იყო საკმაოდ ჩაკეტილი, არ კონტაქტობდა მეზობლებთან და ეზოში ან მაღაზიაში თუ შეხვდებოდნენ მას შემთხვევით. ამაზე მეტი კომუნიკაცია მათ თავდამსხმელთან არ ჰქონიათ. ასევე, იციან, რომ ის იყო სამხედრო მოსამსახურე.
"გამოძიება სისხლის სამართლის კოდექსის 109-ე მუხლის „ლ“ ქვეპუნქტით და 236-ე მუხლის მესამე ნაწილით მიმდინარეობს, რაც დამამძიმებელ გარემოებაში ჩადენილ განზრახ მკვლელობას და ცეცხლსასროლი იარაღისა და საბრძოლო მასალის უკანონო შეძენა-შენახვასა და ტარებას გულისხმობს“, - ნათქვამია შს სამინისტროს მიერ გავრცელებულ განცხადებაში.
