„ნაპოლის“ მფლობელმა, აურელიო დე ლაურენტისმა გაამხილა, თუ რატომ ვერ შეძლეს ნეაპოლელებმა 2020 წელს ხვიჩა კვარაცხელიას შეძენა, როდესაც ის ყაზანის „რუბინში“ თამაშობდა.
„ფანები ყოველთვის მართლები არიან, მათ შეუძლიათ, თქვან, რაც უნდათ. ბუნებრივია, ისინი სკეპტიკურად იყვნენ ჩვენ მიმართ განწყობილები. მაგრამ მე 30 მაისს ვთქვი, რომ „სკუდეტოს“ მოვიგებდით და ყველაფერი ამისკენ მიდის.
კარგი მწვრთნელი გვყავს, რომელსაც პოტენციალის გამოსავლენად კარგი ფეხბურთელები სჭირდება, ამ სეზონის დაწყებამდე კი ძალიან კარგი ფეხბურთელები მოვიყვანეთ. ამის გამო კრიშტიანო ჯუნტოლი პატივისცემას იმსახურებს.
მან ხვიჩა ჯერ კიდევ 2020 წელს შენიშნა, მაგრამ საბოლოოდ უარი ვთქვით მის ყიდვაზე, რადგან იმ დროს „ნაპოლის“ ბიუჯეტში ზარალი 200 მილიონი ევრო იყო, „რუბინმა“ კი 30 მილიონი მოსთხოვა, რაც მეტისმეტი იყო“, – ციტირებს დე ლაურენტისის სიტყვებს „მონდო ნაპოლი“.
ხვიჩა „ნაპოლის“ 2022 წლის ზაფხულში ბათუმის „დინამოდან“ გაცილებით ზომიერი თანხის, 10 მილიონი ევროს საფასურად შეუერთდა. მიმდინარე სეზონში ქართველმა ფეხბურთელმა „ნაპოლის“ შემადგენლობაში ყველა ტურნირზე 25 მატჩი ჩაატარა, 12 გოლი გაიტანა და 15 საგოლე გადაცემა შეასრულა.
