რამდენიმე ოლქთან მიმართებით კიდევ მიმდინარეობს კონსულტაციები ოპოზიციურ კოლეგებთან და საბოლოო ჯამში ამოცანაა, რომ ყველგან, ყველა ოლქში დამარცხდეს „ქართული ოცნების" კანდიდატი და ყველგან „ქართულმა ოცნებამ" მიიღოს ბევრად დაბალი შედეგი, ვიდრე 43%-ია, - ამის შესახებ „ლელო საქართველოსთვის" ერთ-ერთმა ლიდერმა ბადრი ჯაფარიძემ განაცხადა.
მისივე თქმით, ფოთთან დაკავშირებით პარტიას ამ ეტაპზე კონკრეტული შეთანხმება არ აქვს და შესაბამისად, ჯაფარიძეს უჭირს კითხვაზე პასუხის გაცემა, დაუჭერს თუ არა მხარს გიგი უგულავას, რომელსაც, როგორც „ნაციონალურ მოძრაობაში" აცხადებენ, ფოთის მერობის კანდიდატად წარადგენენ.
„რა თქმა უნდა, ამ ბრძოლაში „ლელო" მონაწილეობას იღებს დამოუკიდებლად, მაგრამ იქ, სადაც მიზანშეწონილი იყო, ჩვენ შევძელით კოორდინირება ოპოზიციონერ კოლეგებთან. რაც შეეხება კონკრეტულად ფოთს, ფოთთან დაკავშირებით ამ ეტაპზე კონკრეტული შეთანხმება არ გვაქვს. იმედი გვაქვს, რომ ფოთშიც ჩვენ, ყველანი, ოპოზიციური ძალები მოვახერხებთ, რომ ჯამში მივიღოთ გაცილებით მეტი მხარდაჭერა. ამიტომ ფოთის შემთხვევაშიც ამოცანა იგივე რჩება, როგორც სხვა ოლქებში - „ქართული ოცნების"კანდიდატის დამარცხება და ასევე „ქართული ოცნების" მიერ 40%-ზე ბევრად დაბალის მიღება, რაც დღეს არის აბსოლუტური რეალობა", - განაცხადა ბადრი ჯაფარიძემ.
