საქართველოს საკონსტიტუციო სასამართლომ ხუთი ოპოზიციური პარტიის არაკონსტიტუციურად ცნობის შესახებ სარჩელის განხილვისას მოსამართლეთა აცილების შუამდგომლობები არ დააკმაყოფილა.
შუამდგომლობები მოპასუხე ოპოზიციური პარტიების წარმომადგენლებმა დააყენეს. მათი ნაწილი საკონსტიტუციო სასამართლოს პლენუმის სრული შემადგენლობის აცილებას მოითხოვდა, ნაწილი კი რამდენიმე მოსამართლის აცილების საკითხს აყენებდა.
შუამდგომლობების განხილვის შემდეგ სასამართლომ მოთხოვნები არ დააკმაყოფილა. გადაწყვეტილება საკონსტიტუციო სასამართლოს თავმჯდომარემ რევაზ ნადარაიამ გამოაცხადა.
საკონსტიტუციო სასამართლოში მმართველი გუნდის მიერ წარდგენილი სარჩელის განხილვა დღეს, 21 ოქტომბერს დაიწყო. საქმეს შვიდი მოსამართლისგან შემდგარი პლენუმი განიხილავს.
სარჩელს საქართველოს პარლამენტის 88 დეპუტატი აწერს ხელს. მოსარჩელეები ხუთი პოლიტიკური გაერთიანების არაკონსტიტუციურად ცნობას მოითხოვენ.
საუბარია შემდეგ პარტიებსა და პოლიტიკურ გაერთიანებებზე:
-
„ერთიანობა – ნაციონალური მოძრაობა“;
-
„კოალიცია ცვლილებისთვის – გვარამია, მელია, გირჩი, დროა“;
-
„ძლიერი საქართველო – ლელო, ხალხისთვის, თავისუფლებისთვის!“;
-
„ფედერალისტური პარტია“;
-
„გახარია საქართველოსთვის“.
მოსამართლეთა აცილების შუამდგომლობების უარყოფის შემდეგ სასამართლო საქმის განხილვას არსებული შემადგენლობით გააგრძელებს.
ამ ეტაპზე სასამართლოს პოლიტიკური პარტიების არაკონსტიტუციურად ცნობის მოთხოვნაზე არსებითი გადაწყვეტილება არ მიუღია.
