გიორგი ვაშაძე ყავის მსმელებს უწოდებს ადამიანებს, რომლებიც მთელი ამ დროის განმავლობაში იყვნენ 12 პუნქტის შესრულებაში ჩართული, – ამის შესახებ ჟურნალისტებს პარტია „ქართული ოცნების“ თავმჯდომარემ, საპარლამენტო უმრავლესობის ლიდერმა ირაკლი კობახიძემ გიორგი ვაშაძის განცხადების შესახებ დასმულ კითხვაზე განუცხადა.
მისი თქმით, პარლამენტში შექმნილი სამუშაო ჯგუფების წევრები, რომლებსაც გიორგი ვაშაძემ ყავის მსმელები უწოდა, მთელი ამ დროის განმავლობაში დაკავებულნი იყვნენ ევროკომისიის 12 რეკომენდაციის შესრულებაზე მუშაობით.
„რეალურად ეს არის რადიკალური ოპოზიციის დამოკიდებულება 12 პუნქტის შესრულების პროცესის მიმართ. ეს ადამიანები მთელი ამ დროის განმავლობაში მუშაობდნენ 12 პუნქტის შესრულებაზე, როდესაც ყავას სვამდა სწორედ ვაშაძე. ყავის მსმელებს უწოდებს იმ ადამიანებს, რომლებიც მთელი ამ დროის განმავლობაში იყვნენ 12 პუნქტის შესრულებაში ჩართული. ეს არის მათი დამოკიდებულება. ისინი სულმოუთქმელად ელოდებიან დეკემბერს, რომ ქვეყანამ არ მიიღოს კანდიდატის სტატუსი, რათა ეს ყველაფერი საბოლოო ჯამში გამოიყენონ ქვეყნის ასარევად, თუმცა ჩვენ იმედი გვაქვს, რომ დეკემბერში მიღებული იქნება სამართლიანი გადაწყვეტილება, განსხვავებით შარშანდელი გადაწყვეტილებისგან“, – განაცხადა ირაკლი კობახიძემ.
