საქართველოს ჯანდაცვის მინისტრის, ზურაბ აზარაშვილის განცხადებით, მიმდინარე კვირაში დაგეგმილია ღონისძიება, რომლის ფარგლებშიც რესპუბლიკურ საავადმყოფოსთან დაკავშირებით სხვადასხვა საკითხს დეტალურად განიხილავენ.
მისივე თქმით, ასევე დეტალურად ისაუბრებენ თანამშრომლებისთვის შეთავაზებული პირობების შესახებ.
„თვე-ნახევრის წინ ვთქვი, რომ, პირველადი შეფასებით, პირველადი დასკვნებით, აუცილებელი იქნებოდა შენობის ნაწილის დემონტაჟი და ახალი შენობის აშენება. როგორც მაშინაც აღვნიშნე, ვმუშაობდით კონცეფციაზე, შესათავაზებელ პირობებზე; ყველა დასაქმებული სამედიცინო პერსონალიდან აუცილებლად იქნებოდა უზრუნველყოფილი სამსახურით ან გაგრძელდებოდა სახელფასო ანაზღაურების გადახდა. ამ კვირაში, პარასკევს გვაქვს დაგეგმილი ღონისძიება, სადაც დეტალურად გავივლით შეთავაზების ყველა პირობას როგორც თანამშრომლებთან, ასევე დეტალურად გავივლით, ამ ეტაპზე რა ინფორმაცია გვაქვს კლინიკასთან დაკავშირებით, რა გზით მივდივართ. პროცესი არცთუ ისე ხანმოკლეა“, – განაცხადა ზურაბ აზარაშვილმა.
ამასთან, როგორც ზურაბ აზარაშვილმა აღნიშნა, საბოლოო გადაწყვეტილება ჯერ მიღებული არ არის, დემონტაჟი განხორციელდება თუ რეაბილიტაცია, თუმცა არ შეიცვლება გადაწყვეტილება, რომ რესპუბლიკური საავადმყოფო მაღალტექნოლოგიური და საერთაშორისო სტანდარტების შესაბამისი უნდა იყოს.
„პარალელურად, რამდენიმე სხვადასხვა კომპანიაში მიმდინარეობს შეფასებითი სამუშაოები, როგორც ქვეყნის შიგნით, ასევე ქვეყნის გარეთ და ტექნიკური, ინფრასტრუქტურული თვალსაზრისით რას ვიზამთ, დემონტაჟი მოხდება, რეაბილიტაცია თუ ასე შემდეგ, საბოლოო გადაწყვეტილებას ყველა დოკუმენტის წარმოდგენის შემდეგ მივიღებთ.
კლინიკა რომ უნდა იყოს სახელმწიფო კლინიკა, მაღალტქენოლოგიური და ყველა სტანდარტების შესაბამისი, რა სტანდარტებსაც ჩვენ 2025 წლიდან საქართველოში მოქმედ ყველა კლინიკას ვთხოვთ, ეს გადაწყვეტილება ნამდვილად მიღებულია და არ შეიცვლება. ახლა უკვე დეტალებია დასაზუსტებელი, როგორ მოხდება. სხვადასხვა ვადაში იქნება წარმოდგენილი დოკუმენტები. პარალელურად სწავლობს როგორც სამხარაულის ექსპერტიზის ბიურო, ასევე ევროპის საინვესტიციო ბანკის მიერ დაქირავებული კონსულტანტების ჯგუფი. ბოლო ორი თუ სამი წლის განმავლობაშიც ევროპის საინვესტიციო ბანკი აქტიურად სწავლობდა აღნიშნულ კლინიკასთან დაკავშირებულ პრობლემებს და თავის შეთავაზებას ამზადებდნენ. რაღაც პერიოდის განმავლობაში შეჩერებული იყო, დღეს უკვე გაგრძელებულია პროცესი და საბოლოო დასკვნა გვექნება“, – განაცხადა ზურაბ აზარაშვილმა.
