ევროკომისიამ, ციფრული სერვისების შესახებ კანონის ფარგლებში, ონლაინ პლატფორმებისა და საძიებო სისტემების პირველი სია განსაზღვრა

ევროკომისიამ, ციფრული სერვისების შესახებ კანონის ფარგლებში, ონლაინ პლატფორმებისა და საძიებო სისტემების პირველი სია განსაზღვრა.

მათ შორისაა ონლაინ პლატფორმები: Alibaba AliExpress, Amazon Store, Apple AppStore, Booking.com, Facebook, Google Play, Google Maps, Google Shopping, Instagram, LinkedIn, Pinterest, Snapchat, TikTok, Twitter, Wikipedia, YouTube, Zalando.

საძიებო სისტემები: Bing, Google Search.

ევროკომისიის განცხადებაში ნათქვამია, რომ აღნიშნულ სიაში მოხვედრილმა პლატფორმებმა და საძიებო სისტემებმა მომდევნო ოთხი თვის ვადაში სრულად უნდა შეასრულონ კანონით გათვალისწინებული ვალდებულებები, რომლებიც მიმართულია ონლაინ მომხმარებლების, მათ შორის არასრულწლოვნების დაცვის მიმართულებით. აღნიშნულმა სერვისებმა უნდა შეაფასონ და შეამცირონ მათი სისტემური რისკები და უზრუნველყონ კონტენტის მოდერაციის საიმედო ინსტრუმენტები. აღნიშნული მოიცავს: დამატებით შესაძლებლობებს მომხმარებელთათვის, არასრულწლოვნების გაძლიერებულ დაცვას, კონტენტის უფრო ზედმიწევნით მოდერაციას, ნაკლებ დეზინფორმაციას, უფრო მეტ გამჭვირვალობასა და ანგარიშვალდებულებას.

ციფრული სერვისების შესახებ კანონი განხორციელდება პანევროპული საზედამხვედველო სტრუქტურის საშუალებით. კომისია მჭიდროდ ითანამშრომლებს ციფრული სერვისების კოორდინატორებთან ზედამხვედველობის ფარგლებში.

განცხადებაში ასევე აღნიშნულია, რომ ეს უწყებები უნდა შეიქმნას ევროკავშირის წევრი სახელმწიფოების მიერ 2024 წლის 17 თებერვლამდე.

კომისიამ ინიციატივა ციფრული სერვისების კანონის შესახებ 2020 წლის 15 დეკემბერს ციფრული ბაზრების შესახებ კანონთან ერთად წარადგინა, როგორც ყოვლისმომცველი ფორმატი, რათა უზრუნველყოფილ იქნას უფრო უსაფრთხო, უფრო სამართლიანი ციფრული სივრცე ყველასთვის. ციფრული სერვისების შესახებ კანონი ძალაში 2022 წლის 16 ნოემბერს შევიდა. მომხმარებლები მიიღებენ ზუსტ ინფორმაციას იმის შესახებ, თუ რატომ ურჩევენ მათ კონკრეტულ ინფორმაციას და ექნებათ უფლება, უარი თქვან სისტემურ რეკომენდაციებზე.