არც ერთი არგუმენტი, მტკიცებულება იმისა, რომ ლაზარე გრიგორიადისი წინასწარ პატიმრობაში უნდა იყოს, გარდა იმისა, რომ კრემლს აბარებენ ანგარიშს, არ არსებობს, ამ ახალგაზრდა ადამიანის სასამართლო გაიმართება ხვალ და თითოეული ჩვენგანის მოქალაქეობრივი ვალია, იქ ვიყოთ და დავიცვათ ლაზარეს უფლებები, – ამის შესახებ „ნაციონალური მოძრაობის“ თავმჯდომარემ, ლევან ხაბეიშვილმა განაცხადა.
ხაბეიშვილის თქმით, „ლაზარე გრიგორიადისი მძევლად ჰყავთ აყვანილი და კრემლს აბარებენ ანგარიშს, რომ ყველას, ვინც ანტირუსულ კამპანიაში ჩაერთვება, დასჯიან“.
რუსულმა ოცნებამ, რუსმა ოლიგარქმა ბიძინა ივანიშვილმა და მისმა კრიმინალურმა რეჟიმმა, რომელიც იმართება პირდაპირ კრემლიდან, საქართველოში დასჯადი გახადეს ევროპის მხარდაჭერა. ისინი ფიქრობენ, რომ ვინც ანტიპუტინისტურ მოძრაობაში, ანტირუსულ აქციაში ჩაერთვება, საქართველოს ოკუპაციას გააპროტესტებს, რუსულ კანონს გააპროტესტებს, იმ ადამიანებზე გამოაცხადებენ დევნას, დასჯიან და კრემლს გაუგზავნიან გზავნილს, რომ ანტიპუტინისტურ მოძრაობებს, აქციებს, ანტირუსულ აქციებს დაარბევენ. მეტიც, ყველას დასჯიან და დაიჭერენ, ვინც ევროპის მხარდამჭერ აქციაზე გამოვა, ვინც ევროპის მხარდამჭერი იქნება. ამასობაში, ვნახეთ, რომ მათ ფაქტობრივად მძევლად აიყვანეს 21 წლის ახალგაზრდა ლაზარე გრიგორიადისი. მინდა, მთელ საქართველოს, ჩვენს მოქალაქეებს ვუთხრა შემდეგი რამ: ჩემო მეგობრებო, ყველა, ვინც ფიქრობთ, რომ ჩვენი ქვეყნის მომავალი არის ევროპაში, ევროკავშირში, თქვენ გემუქრებიან დაკავებით და ამის ნათელი დადასტურება და გამოხატულება არის ლაზარე. ლაზარეს დაკავების არანაირი მტკიცებულება, არანაირი ფორმალური შესაძლებლობაც კი არ არსებობს, წინასწარი პატიმრობა რატომაა? მაგალითად, რობოკოპებს დააშინებს ანუ მოწმეებზე ზეგავლენას მოახდენს? 21 წლის ახალგაზრდა წინასწარ პატიმრობაში რატომ უნდა ჰყავდეს რუსულ რეჟიმს, რის გამო? სადმე გაექცევათ ლაზარე? არ შეუძლიათ, რომ პასპორტი ჩამოართვან ან საზღვარზე გააკონტროლონ? მიზანმიმართულად ჰყავთ დაკავებული. სხვა არც ერთი არგუმენტი, მტკიცებულება იმისა, რომ ლაზარე წინასწარ პატიმრობაში უნდა იყოს, გარდა იმისა, რომ კრემლს აბარებენ ანგარიშს, მესიჯი აქვთ, რომ ყველას ვინც ანტირუსულ კამპანიაში ჩაერთვება, ვინც პროევროპულ კამპანიაში იქნება, ვისაც ევროპა უნდა, ყველას დასჯიან. ამ ახალგაზრდა ადამიანის სასამართლო გაიმართება ხვალ და თითოეული ჩვენგანის მოქალაქეობრივი ვალია, ვიყოთ და დავიცვათ ლაზარეს უფლებები, რადგან ის ფაქტობრივად, ყოველგვარი მტკიცებულებების, სამართლებრივი ჩარჩოების გარეშე წინასწარ პატიმრობაში ჰყავთ მძევლად აყვანილი. ხვალ მნიშვნელოვანია ლაზარეს სასამართლოზე თითოეული მოქალაქის ყოფნა და მხარდაჭერა“, – განაცხადა ხაბეიშვილმა.
