ბიძინა ივანიშვილისა და რუსული ოცნების ოცნებაა, რომ „ნაციონალური მოძრაობა“ გაჩერდეს, „ნაციონალურმა მოძრაობამ“ ოფისები არ გახსნას, „ნაციონალურმა მოძრაობამ“ არ იაქტიუროს, „ნაციონალურ მოძრაობაში“ შიდა დემოკრატია არ იყოს, და ზოგადად, საქართველოში რუსული პარტიის ოცნებაა, გაჩერდეს „ნაციონალური მოძრაობა“, – ამის შესახებ „ნაციონალური მოძრაობის“ თავმჯდომარემ, ლევან ხაბეიშვილმა განაცხადა.
ხაბეიშვილს ჟურნალისტებმა კითხვა დაუსვეს პარტიის ყოფილი თავმჯდომარის გუშინდელ განცხადებასთან დაკავშირებით, სადაც ნიკა მელია ამბობს: „ნაციონალური მოძრაობის“ მართვის ბერკეტებს სრულად ფლობენ დავით კეზერაშვილი, ვანო მერაბიშვილი და ზურაბ ადეიშვილი.“
„ახლა, თქვენ რაც წამიკითხეთ (მელიას ციტატა), რომ არ გეთქვათ სახელი და გვარი, ვიფიქრებდი, რომ სახელისუფლებო პარტიიდან, ხომ არ საუბრობს ვინმე. ნებისმიერ შემთხვევაში პარტია გააგრძელებს გაძლიერებას, პარტიაში გაგრძელდება შიდა დემოკრატიული არჩევნები. წარმოუდგენელია შიდა დემოკრატიული არჩევნები აზიანებდეს პარტიას და თურმე ჭორაობა და პარტიის ლანძღვა-გინება აძლიერებს. ეს არის იმ ადამიანების ლოგიკა, რომლებიც ძალიან ბევრ რამეს რომ ვერ დაეწივნენ, იმიტომ არიან დღეს იმ მდგომარეობაში, რა მდგომარეობაშიც არიან. შესაბამისად, მე არ ვაპირებ მათზე კომენტარების გაკეთებას, საზოგადოებამ თავად გააკეთოს ანალიზი“, – განაცხადა ხაბეიშვილმა.
„ნაციონალური მოძრაობის“ თავმჯდომარე ნიკა მელიას გუშინდელი განცხადებების შეფასებისას აღნიშნა, რომ მელიამ თავად დატოვა ყველა სივრცე, რაც უკავშირდება „ნაციონალურ მოძრაობას.“
„ჩემი აზრით, გუშინდელი ეთერის შემდეგ, მელიამ თავად დატოვა ყველა სივრცე, რაც უკავშირდება „ნაციონალურ მოძრაობას.“ თავად გავიდა აბსოლუტურად ყველაფრიდან, მიუხედავად იმისა, რომ ერთი სული აქვთ კონკრეტულ ადამიანებს, რომ იქნებ, როგორმე პარტიიდან გავრიცხო. ეს არ არის ჩემი საქმე, ეს მე არ მაინტერესებს. მე მაინტერესებს რუსი ოლიგარქის წინააღმდეგ ბრძოლა, ჩვენი ხალხის, ქვეყნის მომავალი და კონკრეტული ადამიანები დროს რომ კარგავენ ამ ლაილაიში, ვწუხვარ ამის გამო“, – განაცხადა ხაბეიშვილმა.
