ევროკავშირის ოფისთან პარტია „ქართული ოცნების" თავმჯდომარე ირაკლი კობახიძესა და „ნაციონალური მოძრაობის" ლიდერ ნიკა მელიას შორის დაპირისპირება მოხდა.
ირაკლი კობახიძე მედიასთან კომენტარს აკეთებდა, რა დროსაც მასთან ნიკა მელია მიიჭრა.
ნიკა მელიამ კობახიძეს მიმართა: „შენ გჯერა, რომ მართლა დმანისში ჩვენ დავჭერით საკუთარი აქტივისტები? გჯერა? უსინდისო ხარ, 2 ოქტომბერს მიიღებ შესაბამის პასუხს. უნამუსოვ, ბიძინა ივანიშვილის მონავ".
საპასუხოდ ირაკლი კობახიძემ მელიას „ნაძირალა პროვოკატორი" უწოდა. კობახიძემ მელიას მიმართა: „ეს არის თქვენი სახე".
„ასე აწყობენ პროვოკაციებს ეს ნაძირლები და ბინძურები. პროვოკატორი, ხულიგანი, უინტელექტო, ბინძური", - განაცხადა ირაკლი კობახიძემ.
მხარეებს შორის სიტყვიერი ინციდენტი რამდენიმე წუთს გაგრძელდა.
ნიკა მელიამ ჟურნალისტებს განუცხადა, რომ ირაკლი კობახიძეს არ უნდა მიეცეს ტყუილის ტირაჟირების შესაძლებლობა.
„ადამიანი, რომელიც ბედავს, რეჟიმი, რომელიც ბედავს, სასიკვდილოდ დაგიჭრას მშვიდობიანი მოქალაქეები მხოლოდ იმიტომ, რომ ისინი მოდიან შენს საარჩევნო შეხვედრაზე, ამის შემდეგ გამოდიან და საუბრობენ, თითქოს ჩვენ მოვაწყვეთ პროვოკაცია, თითქოსდა ჩვენ სასიკვდილოდ დავჭერით ხანჯლებითა და დანებით, თითქოს ჩვენ გავუსწორდით ფიზიკურად ადამიანს რუსთავში სამი დღის წინ. ეს ადამიანი არ იმსახურებს იმას, რომ მას მიეცეს შესაძლებლობა, მოახდინოს ტყუილის ტირაჟირება ისე, როგორც არის მიჩვეული. როგორც დატოვა ეს სივრცე, ზუსტად ასე დატოვებენ 2 ოქტომბერს ეს რეჟიმის მსახურები", - განაცხადა ნიკა მელიამ.
