ოკუპირებული აფხაზეთის შს მინისტრმა დიმიტრი დბარმა დროებით უფლებამოსილება მოიხსნა. მიზეზი სოხუმში მომხდარი ინციდენტი გახდა, რომელშიც დეფაქტო პარლამენტის წევრი გარი კოკაია მონაწილეობდა.
სროლა 30 სექტემბერს სანაპიროზე მდებარე რესტორანთან მოხდა, სადაც დეპუტატი ე.წ. დამოუკიდებლობის დღეს ომის ვეტერანებთან ერთად აღნიშნავდა.
რესტორნიდან გამოსულმა კოკაიამ სროლა დაიწყო. ადგილზე ე.წ. შს მინისტრის მისვლა გახდა საჭირო. მილიციელებს დეპუტატმა ფიზიკური წინააღმდეგობა გაუწია, რასაც ე.წ. სამართალდამცველებსა და ვეტერანებს შორის დაპირისპირება მოჰყვა. ინციდენტისას 7 ვეტერანი დაშავდა.
მოგვიანებით შსს-ს შენობასთან ავტომატური იარაღით ცეცხლი კიდევ ერთმა ე.წ. დეპუტატმა ალმასხან არძინბამ გახსნა. მომხდარს არაღიარებული რესპუბლიკის გენპროკურატურა იძიებს.
