საქართველოს საგარეო საქმეთა მინისტრის, ილია დარჩიაშვილის განცხადებით, ოპოზიციის წარმომადგენლებისგან დღეს „მინისტრის საათის“ ფორმატში საქმესთან დაკავშირებით კითხვები ვერ მოისმინა.
მისივე თქმით, არ არის კარგი, როდესაც ოპოზიციის წარმომადგენლები მინისტრს კითხვებს უსვამენ, პასუხებს კი არ ელოდებიან და დარბაზიდან გადიან. ამასთან, ილია დარჩიაშვილმა დარბაზში დარჩენილ ერთადერთ ოპოზიციონერ დეპუტატს არმაზ ახვლედიანს მადლობა გადაუხადა.
„არანაირი კითხვა არ დასმულა მათი მხრიდან საქმესთან დაკავშირებით. ალბათ იმიტომ, რომ ნახეს ანგარიში, წაიკითხეს და ვერ დაინახეს ის, რაც შეიძლებოდა, სხვანაირად გაკეთებულიყო. უბრალოდ გამოხატეს დამოკიდებულება, ისე, როგორც გამოხატეს. მეგონა, ქალბატონი სალომე საგარეო პოლიტიკის მიმართულებით რაღაცას გამოხატავდა, მაგრამ მივულოცავ მას ქალბატონი ანი წითლიძის ლიგაში გადასვლას საგარეო პოლიტიკის შეფასების ნაწილში. ბატონო არმაზ, გადაეცით ეს“, – განაცხადა ილია დარჩიაშვილმა.
