საგარეო საქმეთა მინისტრის პასუხებით ოპოზიცია უკმაყოფილოა. „ლელოს“ ერთ-ერთი ლიდერის, სალომე სამადაშვილის შეფასებით, ილია დარჩიაშვილმა მის არცერთ კითხვაზე პასუხი არ გასცა.
სალომე სამადაშვილმა კიდევ ერთხელ მოუწოდა მინისტრს გასცეს კონკრეტული პასუხი დეპუტატის კითხვას - ევროკავშირი სთხოვს თუ არა საქართველოს ერთსქესიანთა ქორწინების დაკანონებას კანდიდატის სტატუსის სანაცვლოდ. დეპუტატს სურს, განმარტება მოისმინოს სწორედ იმ პირისგან, რომელიც საკუთარი სტატუსით პასუხისმეგებლია ქვეყნის საგარეო პოლიტიკაზე.
"5 კითხვიდან რეალურად პასუხი არცერთ კითხვაზე არ გაქვთ. კიდევ ერთხელ გეკითხებით - ქართული ოცნების და მისი მოკავშირე პარტიის „ხალხის ძალის“ წარმომადგენლები, მათ შორის, ამ დარბაზში, როდესაც საუბრობენ იმას, რომ ევროკავშირი საქართველოს სთხოვს ჩვენი ტრადიციებისთვის და ჩვენი სოციუმისთვის მიუღებელი ცვლილებების განხორციელებას, რომ, მაგალითად, დედას მამა უნდა დაუძახო, მამას - დედა, ერთსქესიანთა ქორწინება უნდა დააკანონო, ეს მართალია თუ ტყუილია, ითხოვს ამას ევროკავშირი საქართველოსგან? კი თუ არა?“ - განაცხადა სალომე სამადაშვილმა.
