„იქნებიან ლიდერებიც, ყველა ის ადამიანი, რომლისთვისაც ძალიან მნიშვნელოვანია რეჟიმის დამარცხება, მიხეილ სააკაშვილის თავისუფლება," - განაცხადა ენმ-ს ერთ-ერთმა ლიდერმა, ქუთაისის მერობის კანდიდატმა, ხატია დეკანოიძემ.
მისივე თქმით, დღეს, 4 ნოემბერს, ერთიანი ოპოზიცია რიგგარეშე არჩევნებისა და საქართველოს მესამე პრეზიდენტის, მიხეილ სააკაშვილის გათავისუფლებას კიდევ ერთხელ, ამჯერად ქუთაისში გამართულ აქციაზე მოითხოვს.
მოქალაქეები 17:00 საათზე ქუთაისის ცენტრში, თოჯინების თეატრის მიმდებარე ტერიტორიაზე შეიკრიბებიან.
"რა თქმა უნდა, იქნებიან როგორც ქუთაისიდან, ასევე იმერეთიდან. იქნებიან ლიდერებიც, ყველა ის ადამიანი, რომლისთვისაც ძალიან მნიშვნელოვანია რეჟიმის დამარცხება, მიხეილ სააკაშვილის თავისუფლება. ველოდებით სხვადასხვა ოპოზიციურ პარტიებსაც. ქუთაისში ჩვენი გამარჯვება იყო უპირობო, რაზეც თანხმდება ყველა", - თქვა დეკანოიძემ.
შეგახსენებთ: ოპოზიციის საპროტესტო აქციები უკვე გაიმართა ზუგდიდსა და ბათუმში. შაბათს, 6 ნოემბერს, მასშტაბური აქციაა დაგეგმილი თბილისში, თავისუფლების მოედანზე, რომელსაც მოქალაქეები სხვადასხვა რეგიონებიდანაც შეუერთდებიან.
