„კონსილიუმის განცხადებას პენიტენციური დაწესებულება და ექიმები შეისწავლიან, რის შედეგადაც შესაბამისი სამსახური გადაწყვეტილებას მიიღებს", - განაცხადა დღეს, 18 ნოემბერს, პარლამენტის საპროცედურო საკითხთა კომიტეტის თავმჯდომარე გურამ მაჭარაშვილმა ომბუდსმენის მიერ შექმნილ კონსილიუმის დასკვნაზე.
შეგახსენებთ: სახალხო დამცველის მიერ შექმნილმა ექიმთა ჯგუფმა გუშინ, 17 ნოემბერს, დასკვნა გამოაქვეყნა, სადაც ნათქვამია, რომ მიხეილ სააკაშვილის მკურნალობის გაგრძელება დაუყოვნებლივ რეკომენდებულია ფუნქციურად გამართულ, დიდი გამოცდილების მქონე პოლიპროფილურ ჰოსპიტალში.
„ამ კონსილიუმზე დავინახეთ, რომ ექიმებმა თავის თავზე ვერ აიღეს პასუხისმგებლობა და პირდაპირ ვერ თქვეს, რომ ახლა სააკაშვილს კონკრეტული სამედიცინო მომსახურება ესაჭიროება და ეს არ არის მე-18 დაწესებულებაში. თქვეს, რომ ეს ასე არ არის, თუმცა მათი აზრია, რომ სჯობს, რომელიმე სამოქალაქო კლინიკაში გააგრძელოს მკურნალობა სააკაშვილმა.
კონსილიუმის განცხადებას პენიტენციური დაწესებულება და ექიმები შეისწავლიან, რის შედეგად შესაბამისი სამსახური გადაწყვეტილებას მიიღებს. ვარაუდი გამოითქვა, რომ შეიძლება, ინტენსიური თერაპია დასჭირდეს, მაგრამ ისიც არ თქვეს, რომ ინტენსიური თერაპიისთვის არ არის შესაბამისი აღჭურვილობა. მათ თქვეს, რომ თანამედროვე აღჭურვილობა არის, ექიმებს პროფესიონალიზმი არ დაუწუნეს, მაგრამ თქვეს, რომ შენობას გამოცდილება არ აქვს. ანუ, თუ ტექნიკა თანამედროვეა და ექიმები არიან პროფესიონალები, შენობის გამოცდილება არ მესმის, რისთვის შეიძლება იყოს საჭირო. მათი მოსაზრებაა, რომ გარკვეული მომსახურება დასჭირდეს, რაც შეიძლება, ვერ გასწიონ ექიმებმა. კონკრეტული სამედიცინო მომსახურება არ არის დასახელებული, რომელიც შეიძლება, რომ მე-18 დაწესებულებაში არ გაეწიოს სააკაშვილს", - განაცხადა მაჭარაშვილმა.
