„მიხეილ სააკაშვილის პენიტენციურ დაწესებულებაში დაბრუნება არ შეიძლება. მსჯავრდადებულ პრეზიდენტს პოსტტრავმული სტრესული აშლილობა აქვს და მკურნალობის გარეშე მისმა ციხეში დაბრუნებამ შესაძლოა, პიროვნების დეგრადაცია გამოიწვიოს," - განაცხადა დღეს, 15 დეკემბერს კონსილიუმის წევრმა, ექიმმა გიორგი გეგელიამ.
შეგახსენებთ: მიხეილ სააკაშვილი 1-ელ ოქტომბერს დააკავეს და შიმშილობის 50-ე დღეს გლდანის ციხიდან გორის სამხედრო ჰოსპიტალში გადაიყვანეს, სადაც ამ დრომდე იმყოფება. ასევე, გუშინ 14 დეკემბერს ცნობილი გახდა სახალხო დამცველის მიერ შექმნილი კონსილიუმის დასკვნა.
„მას აქვს ძალიან სერიოზული დიაგნოზი. ეს არის პოსტრავმული სტრესული აშლილობა, რომელიც არის ფსიქო-ნევროლოგიური დიაგნოზი, რომლის მკურნალობაც ჯერ არ დაწყებულა მიუხედავად ჩვენი ძველი რეკომენდაციისა, რომელიც ორი კვირის წინ გავაკეთეთ. ამას დროზე თუ არ დავიწყებთ, ეს სტრესი გაღრმავდება და შეიძლება მივიღოთ აბსოლუტური დეგრადაცია პიროვნების. ამიტომ ახლა ლაპარაკი ისევ იქ დაბრუნების, სადაც მან მიიღო ეს სტრესი და რის გამოც არის ასეთ მდგომარეობაში, მე მგონი არანორმალურია, არაექიმურია და არაჰუმანურია" - განაცხადა გიორგი გრიგოლიამ.
