შეხედეთ ოდესას, კიდევ რამდენიმე არგუმენტი გჭირდებათ გადაწყვეტილების მისაღებად? - ასე მიმართავს პოლონეთის პრემიერ-მინისტრი დონალდ ტუსკი აშშ-ის კონგრესის ქვედა პალატის - წარმომადგენელთა პალატის - სპიკერს მაიკ ჯონსონს „ტვიტერის” პირად გვერდზე.
„შეხედეთ ოდესას, სპიკერო ჯონსონ! კიდევ რამდენიმე არგუმენტი გჭირდებათ გადაწყვეტილების მისაღებად?” - წერს ტუსკი.
პოლონეთის პრემიერ-მინისტრმა განცხადება 16 მარტს დილით გამოაქვეყნა. იმ მომენტისთვის ოდესაში რუსეთის სარაკეტო დარტყმის შედეგად გარდაცვლილთა რიცხვი 21-მდე გაიზარდა.
ცნობისთვის, რესპუბლიკური პარტია და სპიკერი ჯონსონი უკრაინისთვის დახმარების გამოყოფის შესახებ კანონპროექტის კენჭისყრაზე გამოტანას ეწინააღმდეგებიან, მიუხედავად იმისა, რომ კონგრესის ზედა პალატამ - სენატმა - კანონპროექტი უკვე მიიღო. მიმდინარე კვირას ცნობილი გახდა, რომ სპიკერი ჯონსონი ფაქტობრივად დათანხმდა უკრაინისთვის დახმარების განბლოკვას, ოღონდ იმ პირობებით, რომ ეს იქნება წარმომადგენელთა პალატის პროექტი, და კრედიტის ან ლენდ-ლიზის სახით დახმარება.
