ყაზახეთის დედაქალაქ ნურ-სულთანიდან ქუთაისის საერთაშორისო აეროპორტში შესრულდა პირდაპირი ავიარეისი, რომელსაც 68 მგზავრი ჩამოყვა. ამის შესახებ საქართველოს პირველ არხს აეროპორტების გაერთიანების საზოგადოებასთან ურთიერთობის სამსახურის მენეჯერმა, ნანა ბარამიძემ განუცხადა.
ამასთან, ნანა ბარამიძის თქმით, ამავე თვითმფრინავით ყაზახეთში 182 მგზავრი გაფრინდა, მათ შორის ხუთი მცირეწლოვანი.
„წინასწარო ინფორმაციით, რასაც ავიაკომპანიები გვაწვდიან, ხვალ აქტაუდან თბილისის საერთაშორისო აეროპორტის მიმართულებით შესრულდება ფრენა. ჯერჯერობით, მიმდინარეობს მოლაპარაკება, თუ რა ზომის საჰაერო ხომალდით შესრულდება ფრენა, ამიტომ მგზავრების ზუსტ რაოდენობას ვერ ვიტყვით. მაგრამ დანამდვილებით გვეუბნებიან, რომ ხვალ უნდა შესრულდეს.
რაც შეეხება დაგეგმილ ფრენებს, რეგულარული ფრენები ზის განრიგში, დაგეგმილია, უბრალოდ, არ ვიცით, რამდენად შესრულდება. საქართველოს ყველა საერთაშორისო აეროპორტი სრულ მზადყოფნაშია, რომ მიიღოს ფრენები ყაზახეთიდან, თუ ნებისმიერი ქვეყნიდან. ფრენების გადადებასა და არგადადებასთან დაკავშირებით მე ვერ გაგცემთ პასუხს, ამაზე ავიაკომპანიებმა უნდა ისაუბრონ", - განაცხადა ნანა ბარამიძემ.
