ვითარებაში, როცა ვართ აგრესიის, ოკუპაციის მსხვერპლი, პარლამენტმა მიიღოს უკრაინის მხარდამჭერი რეზოლუცია, რომელშიც სიტყვას არ ახსენებს, როგორც ამ ხიფათების მთავარ წყაროსა და საფრთხეზე, არის სრულიად გაუგებარი, - ამის შესახებ „ლელოს" წევრმა, დავით უსუფაშვილმა განაცხადა.
მისივე თქმით, კვლავ შეეცდებიან, რომ რეზოლუციის ტექსტის საბოლოო ვარიანტი იყოს კომპრომისული და ამ კუთხით მუშაობას გააგრძელებენ.
„ქართული სახელმწიფოს ღირსების საქმეა, რომ იმ ვითარებაში, როდესაც არა მხოლოდ ჩვენს მეზობელ სტრატეგიულ პარტნიორ ქვეყანას ემუქრება მორიგი აგრესიის საფრთხე რუსეთისგან, არამედ საქართველოც კვლავ შესაძლოა, აღმოჩნდეს უფრო მძიმე ვითარებაში და ოკუპირებულ ტერიტორიებს მეტი პრობლემა შეემატოს, როცა მთელი მსოფლიო ფეხზე დგას და ყოველდღე ვისმენთ მკაფიო, მკვეთრ პოზიციონირებას იმ ქვეყნების მხრიდანაც, ვისაც ეს საფრთხე საერთოდ არ ემუქრება, ცხადია, საქართველოს მხრიდან საჭიროა მკაფიო პოზიციონირება, ვაჟკაცობა. იმ ვითარებაში, როცა ვართ აგრესიის, ოკუპაციის მსხვერპლი, პარლამენტმა მიიღოს რეზოლუცია, რომელშიც სიტყვას არ ახსენებს როგორც ამ ხიფათების მთავარ წყაროსა და საფრთხეზე, არის სრულიად გაუგებარი.
გუშინ, შუადღეს პრაქტიკულად მიღწეული იყო კომპრომისული ტექსტი, რომელიც „ლელოს" ბოლომდე არ მოგვწონდა, მაგრამ ვინაიდან „ოცნება" მზად იყო, იმ ტექსტზე შეჯერებულიყო, ჩვენც მზად ვიყავით, უკან წაგვეღო ჩვენი მოსაზრება, თუმცა რატომღაც სიტყვა რუსეთი გახდა „ქართული ოცნებისთვის" გადაულახავი წინააღმდეგობა, დაიწეროს, რომ რუსეთიდან მომდინარე საფრთხისგან უნდა დავიცვათ უკრაინა და ჩვენ ჩვენი წვლილი შევიტანოთ დიპლომატიური არხებით. არავინ არავის მოუწოდებს, ომში ჩვენ გადავეშვათ ან რამე უბედურება ჩავიდინოთ.
იყო მცდელობა, რომ რეზოლუცია საწყის ეტაპზევე ყოფილიყო კონსენსუსური და ინიცირება ყოფილიყო ყველასგან ერთად. ჩვენ არ ვკარგავთ იმედს, რომ ორშაბათამდე, როდესაც ბიუროზე ინიცირებულ ტექსტს განიხილავენ, „ქართული ოცნების" ლიდერები გაიაზრებენ, რომ პრაქტიკულად გაუგებარ ვითარებაში იყენებენ თავს საკუთარი მომხრეებისადმი.
აქ ოპოზიცისთან ურთიერთობაში არ არის საქმე. ვერ წარმომიდგენია „ქარღული ოცნების" მომხრე მოქალაქე, რომელიც ამ ყველაფერზე წუხს, არ იყოს გაოცებული, გაკვირვებული, რომ რა საკრალური თემაა, სახელი დაერქვას იმას, რაც ხდება. რუსეთია ოკუპანტი, აბა, ვინაა.
ახლა ტექსტში როგორც წერია, ამას შეიძლება მოსკოვიდან მიეცეს ისეთი ინტერპრეტაცია, რომ საქართველოს პარლამენტმა დაგმო უკრაინაში ომის გაჩაღების მცდელობა, რომელსაც ნატო და დასავლეთი ახორციელებს, თუ არ ჩაიწერა ომის საფრთხე საიდან მოდის. ეს არის მოსკოვის ნარატივი, რადგან მოსკოვიც ლაპარაკობს, რომ უკრაინაში ვითარება დაძაბულია და სადაცაა უკრაინა გამოიყვანონ აგრესორად. ამიტომ ჩვენ ბოლომდე ვეცდებით, რომ მივაღწიოთ კომპრომისს საქართველოს სახელმწიფოსთვის ღირსეულ ტექსტზე, ამიტომ ვაგრძელებთ მუშაობას", - განაცხადა დავით უსუფაშვილმა.
