საქართველოს პარლამენტის თავმჯდომარე შალვა პაპუაშვილი საქართველოში გაერო-ს განვითარების პროგრამის (UNDP) მუდმივ წარმომადგენელს, ნიკ ბერესფორდს შეხვდა.
პარლამენტის პრესსამსახურის ცნობით, შეხვედრაზე ყურადღება გამახვილდა საქართველოსა და UNDP-ს შორის არსებული თანამშრომლობის კიდევ უფრო გაღრმავებასა და გაძლიერებაზე. აღინიშნა გაერო-ს განვითარების პროგრამის მნიშვნელოვანი წვლილის შესახებ საქართველოში დემოკრატიული პროცესების გაძლიერების, ეკონომიკური განვითარების, გარემოსდაცვითი მიმართულების მხარდაჭერისა და კრიზისების პრევენციის კუთხით. მხარეებმა ისაუბრეს UNDP-ის პროექტზე „საპარლამენტო დემოკრატიის კონსოლიდაცია საქართველოში". ნიკ ბერესფორდმა პარლამენტის თავმჯდომარეს გააცნო პროექტის მიმდინარეობა, ასევე შესაბამისი აქტივობები და გეგმები.
შეხვედრაზე ხაზი გაესვა, გენდერული პოლიტიკის მნიშვნელობას და ამ კუთხით პარლამენტში გენდერული საბჭოს მხარდაჭერის მნიშვნელობას, ასევე სამოქალაქო ჩართულობის აუცილებლობას. საუბარი შეეხო გაერო-ს განვითარების პროგრამის მნიშვნელოვან წვლილს საქართველოში ადამიანის უფლებათა დაცვის მექანიზმის გაძლიერებაში.
