უკრაინულ და რუსულ ძალებს შორის ინტენსიურ ბრძოლებს მილსადენთან, რომლითაც რუსეთი ევროპულ ქვეყნებს გაზით ამარაგებს, მიწოდების პროცესი არ შეუფერხებია.
ამის შესახებ ინფორმაციას გაზის კომპანიები ავრცელებენ.
2022 წელს ომის დაწყების შემდეგ, ევროკავშირმა მკვეთრად შეამცირა დამოკიდებულება რუსულ გაზზე, რის შედეგადაც ავსტრია ევროკავშირის ის ქვეყანა გახდა, რომელიც ყველაზე მეტადაა დამოკიდებული რუსეთისგან მიწოდებაზე.
„ჩვენ არ გვაქვს ინფორმაცია რაიმე სახის წნევის შემცირების შესახებ. ყველაფერი მიდის გეგმის მიხედვით, არ არსებობს რაიმე დარღვევების ნიშნები“, – აღნიშნა კომპანია Gas Connect-ის ავსტრიის წარმომადგენელმა.
ამასთან, რუსულ „გაზპრომში“ აღნიშნეს, რომ უკრაინაში ტრანზიტული გაზის მიწოდებას კურსკის ოლქის ქალაქ სუჯას გავლით განაგრძობენ.
„დღევანდელი გადმოსახედიდან, ავსტრიაში მიწოდების პრობლემა მოსალოდნელი არ არის, რადგან შენახვის დონე მაღალია, ასევე რუსული გაზი მიწოდება შეიძლება, შეიცვალოს გერმანიის ან იტალიის გავლით. თუმცა, თუ მიწოდება დაუყოვნებლივ შეწყდება, ავსტრია ეკონომიკურად დაზარალდება, კერძოდ, გერმანული გაზის შენახვის საფასურის გამო“,- აღნიშნავენ ავსტრიის ენერგომარეგულირებელ E-Control-ში.
„ევროაქტივი“ წერს, რომ გერმანიაში გაზის შენახვის საფასური 2022 წლიდან იზრდება, შესაბამისად, ქვეყნის გავლით ავსტრიისთვის გაზის იმპორტი, უფრო ძვირი ჯდება, ვიდრე სლოვაკეთის გავლით.
უკრაინის გავლით გაზის მიმღებთა უმეტესობა აცხადებს, რომ ემზადებიან მიწოდების შეწყვეტისთვის წლის ბოლოსთვის, როდესაც უკრაინასა და რუსეთს შორის სატრანზიტო შეთანხმების ვადა ამოიწურება, რადგან უკრაინაში განაცხადეს, რომ არ სურთ შეთანხმების განახლება.
უკრაინას სლოვაკეთთან, პოლონეთთან, რუმინეთთან და უნგრეთთან რვა ინტერკონექტორი აქვს, საიდანაც რუსული გაზი ევროპაში ხვდება.
