თუ ვინმეს სჭირდება დედის დაფიცება იმის გამო, რომ „ქართულ ოცნებასთან“ არ გავაკეთებთ კოალიციას, ჩვენ ამის წინააღმდეგი არ ვართ, - ასე აფასებს „ერთიანობა ნაციონალური მოძრაობის“ წევრი, პაატა მანჯგალაძე კოალიცია „ცვლილებისთვის“ ინიციატივას, რომ არჩევნების შემდეგ მთავრობის ფორმირების პროცესში „ქართულ ოცნებასთან“ მათი კოალიციიდან არც ერთი წარმომადგენელი არ ითანამშრომლებს.
პაატა მანჯგალაძის თქმით, თავისთავად ცხადია, რომ „ქართულ ოცნებასთან“ამ საკითხში მათი კოალიციიდანაც არავინ ითანამშრომლებს.
„ეს თავისთავად ასე არის, რომ მთავარი ოპოზიციური პარტია, ჩვენი გაერთიანება, „ერთიანობა-ნაციონალური მოძრაობა“, ბუნებრივია, არანაირ და ვერანაირ კოალიციას არ გეგმავს „ქართულ ოცნებასთან“. რაც ისედაც ჭეშმარიტი და ცხადია, კიდევ წერილობით დოკუმენტი საჭირო არ არის“, - განაცხადა პაატა მანჯგალაძემ.
რაც შეეხება სხვა ოპოზიციურ პარტიასთან შესაძლო თანამშრომლობას, იმ ფონზე, როცა სხვა ოპოზიციური პარტიებს „ნაციონალურ მოძრაობასთან“ თანამშრომლობის სურვილს არ გამოთქვამენ, მანჯგალაძის თქმით, მათი გაერთიანების ფორმულა მარტივია, რომ ერთიანობა და ეროვნული თანხმობა არის ხალხის დაკვეთა.
„თუ შესაძლებელი არის და ამაზე ხელი გვაქვს მოწერილი, თანამშრომლობა არჩევნების შემდეგ, რატომ არ შეიძლება თანამშრომლობა არჩევნებამდე?! მაგალითად, თუნდაც არჩევნების გაყალბების წინააღმდეგ საკითხში. თანამშრომლობა, რა თქმა უნდა, შესაძლებელია, ხალხის დაკვეთა არის ერთიანობა თუ არა, ეროვნული თანხმობა.
ცნობისთვის, კოალიცია „ცვლილებისთვის“ აცხადებს,რომ „არც ერთი წარმომადგენელი არ ითანამშრომლებს ბიძინა ივანიშვილის და „ქართული ოცნების“ ავტორიტარულ რეჟიმთან, არჩევნების შემდეგ მთავრობის ფორმირების პროცესში“. კოალიცია „ცვლილებებისთვის“ ლიდერების თქმით, მომავალი მთავრობა იქნება ქართველი ხალხის ნების, პროდასავლური ოპოზიციის კოალიციური მთავრობა.
