საქართველოს ამჟამინდელი ხელისუფლება ჩვენი ევროპული მომავლის წინააღმდეგ საბოტაჟს ახორციელებს. ჩვენ გვჭირდება ევროკავშირის მეტი მხარდაჭერა, რადგან დემოკრატიის ფრონტის ხაზი ახლა უკრაინასა და საქართველოზე გადის, – ამის შესახებ ეკონომიკური პოლიტიკის კვლევის ცენტრის აღმასრულებელმა დირექტორმა ნინო ევგენიძემ ევროპარლამენტის საგარეო საქმეთა კომიტეტის სხდომის შემდეგ გამართულ პრესკონფერენციაზე განაცხადა.
მისი თქმით, საქართველოში ახლა მხოლოდ პოლიტიკური კრიზისი არ არის, არამედ, ეს არის ბრძოლა რუსული იმპერიალიზმის წინააღმდეგ.
„ჩვენ რუსული იმპერიალიზმის წინააღმდეგ 200 წელზე მეტია ვიბრძვით. ჩვენ შეიძლება ბევრი რამ ვერ გასწავლოთ აქ, ევროკავშირში თანამედროვე დემოკრატიაზე, თუმცა ჩვენ ვგრძნობთ, თუ როდის მოდიან რუსები. საქართველოს ამჟამინდელი ხელისუფლება ჩვენი ევროპული მომავლის წინააღმდეგ საბოტაჟს ახორციელებს. ჩვენ გვჭირდება ევროკავშირის მეტი მხარდაჭერა, რადგან დემოკრატიის ფრონტის ხაზი ახლა უკრაინასა და საქართველოზე გადის. საქართველოში ახლა არ არის მხოლოდ პოლიტიკური კრიზისი, ეს არის ბრძოლა რუსული იმპერიალიზმის წინააღმდეგ. სოლიდარობისა და ერთიანობის გარეშე ჩვენ ვერ შევძლებთ ავტორიტარიზმის დამარცხებას“, - განაცხადა მან.
ცნობისთვის, ევროპარლამენტის საგარეო ურთიერთობების კომიტეტმა საქართველოს შესახებ ანგარიშის პროექტი შესწორებებით დაამტკიცა. დოკუმენტს მხარი 55-მა ევროპარლამენტარმა დაუჭირა, 14-მა ხმა მის წინააღმდეგ მისცა და 4-მა თავი შეიკავა.
