ჩინეთის რეაქციას ველით იმის შესახებ, რაც ხდება, - ასე ეხმაურება უკრაინის პრეზიდენტი, ვოლოდიმირ ზელენსკი რუსული ძალების მიერ კიევზე განხორციელებულ თავდასხმას.
უკრაინის პრეზიდენტის ვოლოდიმირ ზელენსკის ცნობით, რუსების თავდასხმის შედეგად კიევში, სულ მცირე, 8 ადამიანი დაიღუპა, მათ შორის ერთი ბავშვი.
„რუსეთი მოლაპარაკების მაგიდის ნაცვლად ბალისტიკურ რაკეტებს და ომის დასრულების ნაცვლად მკვლელობების გაგრძელებას ირჩევს. ეს ნიშნავს, რომ რუსეთს შედეგების ჯერ კიდევ არ ეშინია. ჩინეთმა არაერთხელ გააკეთა მოწოდება ომის გაფართოების წინააღმდეგ და ცეცხლის შეწყვეტის მხარდასაჭერად, თუმცა ეს რუსეთის გამო არ ხდება. ჩვენ რეაქციას უნგრეთისგან ველით. პასუხს ველით ყველასგან, ვინც მშვიდობის მხარდამჭერ მოწოდებებს აკეთებდა, მაგრამ ახლა პრინციპული პოზიციის დაკავების ნაცვლად დუმს“, - წერს ვოლოდიმირ ზელენსკი X-ზე.
მისი თქმით, „რუსეთის მიერ ჩადენილი ქმედებების გამო ახლა ნამდვილად მკაცრი სანქციების დროა“.
„ყველა საბოლოო ვადა დარღვეულია და დიპლომატიის ათეულობით შესაძლებლობა განადგურდა. რუსეთმა პასუხისმგებლობა უნდა იგრძნოს ყოველი დარტყმისა და ამ ომის ყოველი დღისთვის“, - აცხადებს უკრაინის პრეზიდენტი.
