არჩევნებში მონაწილეობის გადაწყვეტილება მივიღეთ კარგად გააზრებისა და ყველა ფაქტორის აწონ-დაწონის შემდგომ. ჩვენ, რა თქმა უნდა, ეს გადაწყვეტილება არ შეგვიცვლია, იმიტომ, რომ ამ გადაწყვეტილების გამო დაგვატუსაღეს. შესაბამისად, ჩვენ ამ გადაწყვეტილების ერთგულები ვრჩებით, - ამის შესახებ „ლელო-ძლიერი საქართველოს“ ერთ-ერთმა ლიდერმა, ბადრი ჯაფარიძემ ჟურნალისტებს, რუსთავის საპატიმროს დატოვების შემდეგ განუცხადა.
როგორც ჯაფარიძემ აღნიშნა, არჩევნებში მონაწილეობის მსურველ ამომრჩეველს მათ იმედი არ უნდა გაუწბილონ.
„პატივს ვცემ ყველა ოპოზიციონერის პოზიციას. ჩვენ გადაწყვეტილება მივიღეთ კარგად გააზრების და ყველა ფაქტორის აწონ-დაწონის შემდგომ. ჩვენ, რა თქმა უნდა, ეს გადაწყვეტილება არ შეგვიცვლია, იმიტომ, რომ ამ გადაწყვეტილების გამო დაგვატუსაღეს. შესაბამისად, ჩვენ ამ გადაწყვეტილების ერთგულები ვრჩებით და მიგვაჩნია, რომ ყველაფერს, რასაც შეუძლია ქვეყნის ევროპული მომავალი მოიტანოს, ქუჩის მშვიდობიანი დემონსტრაცია, ყველა ადამიანს აქვს უფლება ბოიკოტის, ამას ვერავინ ვერავის დაუშლის, მაგრამ ამავდროულად ის ასიათასობით ოპოზიციონერი ადამიანი, ამომრჩეველი, რომელიც მოვა ოპოზიციონერი 4 ოქტომბერს არჩევნებზე, მათ ჩვენ იმედი არ უნდა გავუწბილოთ. მათ უნდა ნახონ, რომ ევროპული პარტიები მზად არიან იბრძოლონ მათი ხმების დასაცავად“, - განაცხადა ბადრი ჯაფარიძემ.
ამასთან, ჟურნალისტების კითხვაზე, ხომ არ ფიქრობს, რომ „ლელო-ძლიერი საქართველოს“ არჩევნებში მონაწილეობის გადაწყვეტილებით პარტიის ის ამომრჩეველი უკმაყოფილოა, რომელმაც მათ კოალიციას საპარლამენტო არჩევნებში ხმა მისცა, ჯაფარიძემ უპასუხა, რომ სწორედ მათი ამომრჩევლის დიდი ნაწილი ითხოვდა მათ თვითმმართველობის არჩევნებში მონაწილეობას.
„ჩვენი ამომრჩევლის ძალიან დიდი ნაწილი მოითხოვდა ჩვენგან არჩევნებში მონაწილეობას. ძალიან დიდი ნაწილი. თქვენ, ალბათ, ეს ინფორმაცია არ გაქვთ. თუ გაქვთ, ამ კითხვას არ დამისვამდით“, - განაცხადა ბადრი ჯაფარიძემ.
ცნობისთვის, მიხეილ ყაველაშვილმა „ლელო-ძლიერი საქართველოს“ ლიდერები, მამუკა ხაზარაძე და ბადრი ჯაფარიძე შეიწყალა. ყაველაშვილმა მიღებული გადაწყვეტილება იმით ახსნა, რომ მას სურს არავის დარჩეს შთაბეჭდილება, რომ ადგილობრივი თვითმმართველობის არჩევნები შეზღუდული კონკურენტუნარიანობის პირობებში ტარდება.
მათ 8 თვით თავისუფლების აღკვეთა ჰქონდათ მისჯილი და ამავე დროს, აკრძალული თანამდებობის დაკავება 2 წლის ვადით.
