4 ოქტომბრის გეგმებში არაფერი იცვლება- ლევანი დააკავეს, მაგრამ მის ადგილას გამოვა ათობით და ასობით სხვა ადამიანი, რომელიც ჩაანაცვლებს ლევანს სწორედ 4 ოქტომბერს,- ამის შესახებ „ნაციონალური მოძრაობის“ გენერალურმა მდივანმა, პეტრე ცისკარიშვილმა ჟურნალისტებს განუცხადა.
მისი თქმით, საზოგადოებაში არსებული მუხტი ვერ ჩაქრება.
„4 ოქტომბრის გეგმებს რაც ეხება, არაფერი იცვლება. რეჟიმს თუ ეგონა, რომ ამით ველს მოასუფთავებდა და ლევანის იზოლირებით ჩააქრობდა იმ მუხტს და ტალღას, რომელიც იგეგმება 4 ოქტომბრისთვის და იმ ბრაზს რაღაცნაირად გაანეიტრალებდა, რაც საზოგადოებაში არსებობს, მე დარწმუნებული ვარ, რომ ეს მოხდება პირიქით - ლევანი დააკავეს, მაგრამ მის ადგილას გამოვა ათობით და ასობით სხვა ადამიანი, რომელიც ჩაანაცვლებს ლევანს სწორედ იმ დღეს, 4 ოქტომბერს, როდესაც ისინი ნახავენ ქართველი ხალხის რისხვას.
უკვე ამდენი წელია, როგორც მიხეილ სააკაშვილის ეშინია ბიძინა ივანიშვილს და ბოლო პერიოდში, როგორც ჩანს ლევანისიც ძალიან შეეშინდა და ამ შიშის გამო სხვა გამოსავალი ვერ იპოვეს, ადამიანის იზოლირება გადაწყვიტეს. ლევანი დააკავეს აბსოლუტურად გაუგებარი, აბურდული ბრალდებით ვითომ ვიღაცას ქრთამს სთავაზობდა. სინამდვილეში კანონის საფუძველზე საბიუჯეტო ასიგნებები გათვალისწინებული ჯილდოს და პრემიის შეთავაზება როგორ შეიძლება იყოს ქრთამი, ამაზე თქვენ თვითონ გაეცით პასუხი,“ -განაცხადა ცისკარიშვილმა ჟურნალისტებთან.
ცნობისთვის, სუს-მა „ნაციონალური მოძრაობის“ ერთ-ერთი ლიდერი, ლევან ხაბეიშვილი ქრთამის სახით მოხელეებისთვის ფულადი თანხების საჯაროდ დაპირების ფაქტზე დააკავა. გამოძიება სისხლის სამართლის კოდექსის 339-ე მუხლის მეორე ნაწილით მიმდინარეობს და სასჯელის სახით 4-დან 7 წლამდე თავისუფლების აღკვეთას ითვალისწინებს.
ხაბეიშვილთან ერთად დააკავეს პოლიტიკოსი მურთაზ ზოდელავაც, რომელმაც სუს-ის ინფორმაციით, გაქცევა სცადა, რა დროსაც ფიზიკური წინააღმდეგობა გაუწია ანტიკორუფციული სააგენტოს თანამშრომლებს და იძალადა ერთ-ერთ მათგანზე.
