გერმანიის ელჩის მიმართ თავდასხმა წარმოადგენს მტრული დეზინფორმაციის სერიის უახლეს მაგალითს, რომელიც მიზნად ისახავს გერმანიისა და სხვა ევროპული ქვეყნების დისკრედიტაციას,- ამის შესახებ განცხადებას ბრიტანეთის საელჩო სოციალურ ქსელში ავრცელებს.
ბრიტანეთის დიპლომატიური მისია გმობს გერმანიის ელჩის მიმართ განხორციელებულ თავდასხმას და მას უსაფუძვლოსა და აგრესიულს უწოდებს.
„დიდი ბრიტანეთი გმობს საქართველოში გერმანიის ელჩის მიმართ განხორციელებულ უსაფუძვლო და აგრესიულ პირად თავდასხმებს. ეს წარმოადგენს მტრული დეზინფორმაციის სერიის უახლეს მაგალითს, რომელიც მიზნად ისახავს გერმანიისა და სხვა ევროპული ქვეყნების დისკრედიტაციას - იმ პარტნიორების, რომლებიც ათწლეულების განმავლობაში საქართველოს გვერდით იდგნენ.
ჩვენ ვუერთდებით გერმანიას და მოვუწოდებთ საქართველოს ხელისუფლებას, შეწყვიტოს ყალბი ნარატივების გავრცელება საქართველოსა და მისი ხალხის მიმართ დასავლური მხარდაჭერის შესახებ,“ - ნათქვამია განცხადებაში.
