რუსეთი დონბასსა და ნოვოროსიას ნებისმიერ შემთხვევაში გაათავისუფლებს, - ამის შესახებ რუსეთის პრეზიდენტმა, ვლადიმერ პუტინმა ინდოეთში ვიზიტამდე India Today-სთან ინტერვიუში განაცხადა.
„ყველაფერი ამისკენ მიდის. ჩვენ ამ ტერიტორიებს ან სამხედრო ძალის გამოყენებით გავათავისუფლებთ, ან უკრაინული ჯარები ამ ტერიტორიებს დატოვებენ და იქ ბრძოლას შეწყვეტენ“, - განაცხადა ვლადიმერ პუტინმა.
ასევე, მისი თქმით, „რუსეთმა უკრაინას დონბასიდან ჯარების გაყვანა შესთავაზა, თუმცა კიევი ბრძოლას ამჯობინებს“.
„ჩვენ მაშინვე ვუთხარით უკრაინასა და უკრაინელ ჯარისკაცებს: ხალხს თქვენთან ცხოვრება არ სურს, მათ რეფერენდუმი ჩაატარეს და ხმა დამოუკიდებლობას მისცეს. გაიყვანეთ თქვენი ჯარები და არანაირი საბრძოლო მოქმედებები არ იქნება. მაგრამ არა, მათ ბრძოლა ამჯობინეს“, - აღნიშნა პუტინმა.
ვლადიმერ პუტინის განცხადებით, აშშ-ის წარმომადგენლებთან, სტივ უიტკოფთან და ჯარედ კუშნერთან ხუთსაათიანი შეხვედრა სამშვიდობო გეგმაზე მუშაობის სირთულემ განაპირობა.
„ჩვენ ახალი ინიციატივები ამერიკელებთან შეხვედრამდე არ გვინახავს. ამიტომ, ყველა პუნქტის განხილვა მოგვიწია და ამდენი დროც დაგვჭირდა. ეს აუცილებელი და კონკრეტული საუბარი იყო“, - განაცხადა პუტინმა.
პუტინმა აღნიშნა, რომ არის საკითხები, რომლებზეც კონსენსუსის მიღწევა ვერ მოხერხდა.
„ასეთი საკითხები არსებობს და ჩვენ ისინი განვიხილეთ, თუმცა ეს რთული სამუშაოა“, - აღნიშნა რუსეთის პრეზიდენტმა.
ასევე, პუტინის თქმით, ვაშინგტონმა მოსკოვს სამშვიდობო გეგმის 28 პუნქტის 4 ნაწილად გაყოფა შესთავაზა.
„სწორედ ამ პუნქტების განხილვა მიმდინარეობს. უბრალოდ, მათ ეს 28 თუ 27 პუნქტი 4 ნაწილად გაყვეს და ამ 4 პაკეტის განხილვა შემოგვთავაზეს. მაგრამ, არსებითად ეს ისევ ის პუნქტებია“, - განაცხადა პუტინმა.
