თბილისის საქალაქო სასამართლომ, ე.წ. საბოტაჟის საქმეზე, „კოალიცია ცვლილებისთვის“ ლიდერის, ზურაბ გირჩი ჯაფარიძის მიმართ პროკურატურის შუამდგომლობა სრულად დააკმაყოფილა და მას აღკვეთის ღონისძიების სახით 30 000 ლარის ოდენობის გირაო შეეფარდა.
ასევე, ზურაბ გირჩი ჯაფარიძეს დამატებით საგამოძიებო უწყებისთვის პასპორტისა და პირადობის მოწმობის ჩაბარება დაევალა.
გადაწყვეტილება მოსამართლე თეონა ეპიტაშვილმა მიიღო.
ზურაბ გირჩი ჯაფარიძეს გირაოს გადახდის ვადად 30 დღე განესაზღვრა.
პროკურატურა მის მიმართ აღკვეთის ღონისძიების სახით გირაოს გამოყენებას 30 ათასი ლარის ოდენობით მოითხოვდა. ასევე მოითხოვდა, დამატებითი ღონისძიების სახით პირადობის მოწმობისა და პასპორტის ჩაბარებას.
პროკურორის განცხადებით, ახალი დანაშაულის ჩადენის საფრთხე და რისკი რეალურია, რადგან ზურაბ გირჩი ჯაფარიძე არ არის კანონმორჩილი მოქალაქე.
მისივე განცხადებით, არსებობს მიმალვის საფრთხეც, რადგან საქმის გარემოებებიდან გამომდინარე მას აქვს კონტაქტები და კავშირები ქვეყნის გარეთ.
ამასთან, დაცვის მხარემ დააყენა შუამდგომლობა, რომ სასამართლომ არ გამოიყენოს არცერთი აღკვეთის ღონისძიება.
ადვოკატის თქმით, არ არსებობს დანაშაულის განმეორებით ჩადენისა და მიმალვის საფრთხე. ამასთან პასპორტის ჩამორთმევით ზურა ჯაფარიძეს გადაადგილებისა და პოლიტიკური საქმიანობის უფლება ჩამოერთმევა.
ცნობისთვის, გენერალურმა პროკურატურამ მიხეილ სააკაშვილს, გიორგი ვაშაძეს, ნიკა გვარამიას, ნიკა მელიას, ზურაბ ჯაფარიძეს, ელენე ხოშტარიას, მამუკა ხაზარაძესა და ბადრი ჯაფარიძეს ახალი ბრალი წაუყენა.
ზურაბ გირჩი ჯაფარიძეს და გიორგი ვაშაძეს ბრალდება საქართველოს სისხლის სამართლის კოდექსის 318-ე მუხლის პირველი ნაწილით და 319-ე მუხლით წარედგინათ, რაც საბოტაჟს და უცხო ქვეყნისათვის მტრულ საქმიანობაში დახმარებას გულისხმობს.
ელენე ხოშტარიას ბრალდება საქართველოს სისხლის სამართლის კოდექსის 318-ე მუხლის პირველი ნაწილით, 319-ე მუხლით და 321-ე პრიმა მუხლის პირველი ნაწილით წარედგინა, რაც საბოტაჟის, აღნიშნული დანაშაულისთვის მატერიალური რესურსების მიწოდებას და უცხო ქვეყნისათვის მტრულ საქმიანობაში დახმარებას გულისხმობს.
ნიკა გვარამიას, ნიკანორ მელიას, მამუკა ხაზარაძეს და ბადრი ჯაფარიძეს ბრალდება საქართველოს სისხლის სამართლის კოდექსის 318-ე მუხლის პირველი ნაწილით წარედგინათ, რაც საბოტაჟს გულისხმობს.
