კირ სტარმერი - მნიშვნელოვანია, რომ გრენლანდიის მომავალი დანიისა და თავად გრენლანდიის მიერ გადაწყდეს

გრენლანდიის მომავალი დანიისა და თავად გრენლანდიის გადასაწყვეტია, - ამის შესახებ დიდი ბრიტანეთის პრემიერ-მინისტრმა, კირ სტარმერმა განაცხადა.

კირ სტარმერი დანიის პრემიერ-მინისტრის, მეტე ფრედერიკსენის განცხადებას გამოეხმაურა იმის შესახებ, რომ აშშ-ის პრეზიდენტმა, დონალდ ტრამპმა გრენლანდიის მიტაცების შესახებ მუქარა უნდა შეწყვიტოს.

„მე მას [დანიის პრემიერ-მინისტრი] მხარს ვუჭერ. ის გრენლანდიის მომავლის შესახებ მართალია. დანია ნატო-ს მოკავშირეა და მნიშვნელოვანია, რომ გრენლანდიის მომავალი დანიისა და თავად გრენლანდიის მიერ გადაწყდეს“, - აღნიშნა დიდი ბრიტანეთის პრემიერ-მინისტრმა.

ცნობისთვის, აშშ-ის პრეზიდენტმა, დონალდ ტრამპმა ჟურნალისტებს კიდევ ერთხელ განუცხადა, რომ აშშ-ს გრენლანდია ეროვნული უსაფრთხოების თვალსაზრისით სჭირდება.